ECI 6 KM NË BORË PËR NJË BILETË AUTOBUSI! HISTORIA E 11-VJEÇARIT TREGON NJË FUND TË LUMTUR, ISHTE “YLLI” NË CEREMONINË E HAPJES SË LOJËRAVE OLIMPIKE NË ITALI
Një vend në rreshtin e parë, i cili iu pa nga e gjithë bota, teksa dy karabinierë ngritën flamurin italian në shtizë! Kështu përfundoi historia e trishtë e një 11-vjeçari, i cili u braktis në mes të reshjeve të borës nga një shofer autobusi më 27 janar, ndërsa kthehej në shtëpi në linjën 30 nga Cortina në Calalzo (Belluno).
11-vjeçari detyrohej të ecte 6 kilometra për të mbërritur në shtëpi, i ftohtë dhe i lagur. Të premten në mbrëmje, gjatë ceremonisë së hapjes së Lojërave Olimpike Milano-Cortina, djali luajti një rol kryesor në ceremoninë e ngritjes së flamurit, duke bashkuar të gjithë stadiumin San Siro të Milanos.
Njëmbëdhjetëvjeçari pa flamurin italian të ngrihej në shtizë, së bashku me Fulvio Valbusa, Christian Zorzi, Giorgio Di Centa dhe Pietro Piller Cottrer, anëtarë të ekipit të stafetës 4×10, fitues të medaljes së artë në Lojërat Olimpike të Torinos 2006. Ai përshëndeti me buzëqeshje të gjithë audiencën, imazhet e së cilës arritën në çdo cep të planetit.
“Ai ishte shumë i lumtur”, tha nëna e tij disa ditë më parë, kur familja mori ftesën për të marrë pjesë në mbrëmje. Sipas mediave italiane, prindërit e 11-vjeçarit kanë bërë paqe me shoferin e autobusit Salvatore Russotto, i cili menjëherë u kërkoi falje prindërve të tij dhe, mbi të gjitha, djalit.
Historia: Pasditen e 27 janarit, njëmbëdhjetëvjeçari kishte në zotërim një biletë udhëtimi prej 2.50 eurosh, jo biletën e rritur prej 10 eurosh që kërkohej për transport. Ai u detyrua të zbriste nga autobusi dhe të kthehej në këmbë mes një stuhie dëbore dhe temperaturave shumë të ulëta. Pas incidentit, Provinca e Bellunos vendosi të heqë biletën prej 10 eurosh për banorët.