33-vjeçar kinez dënohet me burgim të përjetshëm në Londër për përdhunime
Një 33-vjeçar me origjinë kineze është dënuar me burgim të përjetshëm nga një gjykatë në Londër, pasi u shpall fajtor për përdhunimin e të paktën shtatë grave. Sipas Daily Mail, Sao Zhou kryente këto vepra pasi i drogonte viktimat e tij.
Ai u jepte atyre një koktej, për të cilin u kishte thënë viktimave se përmbante alkool dhe një përbërës kinez. Në fakt, ai përdorte pilula të fuqishme që i drogonin gratë dhe i linin ato në gjendje të paaftë për t’u mbrojtur. Ai e kishte pagëzuar këtë përzierje me emrin “Pranvera e Jetës”.
Përdhunimet ndodhën në apartamentin e tij, në një lagje të njohur të Londrës. Zhou organizonte takime me synimin për të ndihmuar gratë e sapoardhura në Britani nga Kina të krijonin rrjete profesionale dhe të njiheshin me biznesmenë. Numri i të ftuarve nuk i kalonte kurrë 20 persona.
Sipas aktakuzës, Zhou kishte arritur të fitonte besimin e grave, të cilat e shihnin atë si një figurë vëllazërore. Kjo strategji e ndihmonte atë të shmangte refuzimet ndaj ftesave të tij. Pasi u jepte viktimave pijen, ai i çonte në dhomën e gjumit kur ato ishin në gjendje të pavetëdijshme dhe i përdhunonte.
Veprimet e tij u zbuluan kur një nga viktimat, pas një feste në qershorin e kaluar, raportoi se kishte humbur ndjenjat dhe ishte zgjuar në shtratin e tij e përdhunuar. Ajo mori guximin të kontaktonte autoritetet.
Gjatë kontrollit të banesës së tij, oficerët e policisë bënë zbulime të papara. Ata gjetën kamera të fshehura në banjë dhe në dhomën e gjumit, madje të vendosura edhe në paketimet e produkteve të higjienës femërore.
Policia zbuloi gjithashtu video të përdhunimeve të grave dhe qindra foto të grave, të moshave 18 deri në 30 vjeç, duke përdorur shkallët lëvizëse të metrosë në stacionin e Urës së Londrës, ndërsa Zhou bënte fotografi nga poshtë.
Në kompjuterin e Zhou-t u zbulua se ai shikonte materiale pornografike me temë “Përdhunim”, ndërsa në telefonin e tij celular kishte koleksione videosh të veprimeve të tij.