Socialistët Shmangin Llogaridhënien e Belinda Ballukut në Kuvend
Belinda Balluku, zv.kryeministrja, e cila është nën akuzë nga qeveria “Rama”, mungoi të enjten në Parlament. Ndërkohë, opozita kërkonte një interpelancë urgjente me të lidhur me hetimin e Prokurorisë së Posaçme për paracaktimin e fituesit të tenderit për tunelin e Llogarasë – një nga veprat më të kushtueshme infrastrukturore të pesë viteve të fundit.
Ndërsa në Parlament debatohej për emrin e saj, Balluku postoi në rrjetet sociale foto dhe video nga një inspektim rutinë në nënstacionin “Tirana 2”. Balluku është marrë e pandehur nga SPAK për veprën penale të “shkeljes së barazisë në tendera”, por vazhdon të mbajë pozicionet e saj në qeveri.
Në mungesë të saj, deputetët socialistë vendosën të rrëzonin me votë kërkesën për interpelancë, duke pretenduar se nuk duhet të përfshihen në punët e drejtësisë. Kryetari i Kuvendit, Niko Peleshi, e justifikoi vendimin me balancën mes pushteteve.
“Kushtetuta ka theksuar se kontrolli parlamentar dhe interpelanca duhet të zhvillohet që mos të cenohet pavarësia e pushteteve të tjera dhe të mos ndërhyjë në veprimtaritë që janë objekt i proceseve gjyqësore apo hetimore. Referuar objektit të kësaj kërkese, ajo lidhet me një çështje në hetim nga SPAK. Zhvillimi i interpelancës është i pamundur për t’u realizuar”, tha Peleshi.
Deputeti i PD-së, Klevis Balliu, një nga nismëtarët e kërkesës për interpelancë, akuzoi socialistët se po mbronin një të pandehur nga drejtësia. Në mënyrë simbolike, ai kishte marrë pranga dhe kërkoi që Balluku të vinte në parlament për të dhënë llogari, ndërsa shtoi se përgjimet e publikuara nga dosja hetimore “tregojnë fytyrën e shëmtuar të pushtetit: njerëz që flasin me gjuhë rrugësh dhe bëjnë pazare me paratë e qytetarëve”.
Edhe deputetë të tjerë të opozitës kërkuan prezencën e Ballukut në seancë si një detyrim ligjor për dhënie llogarie publike.
“Ku e keni sot zv.kryeministren e Shqipërisë? Ku e keni drejtuesen politike të 10 qarqeve? T’i japë llogaritë shqiptarëve se ku janë paratë e tyre”, iu drejtua socialistëve, deputetja e PD-së Ina Zhupa.
“Halli dihet se nëse Balluku vjen, gjëja e parë që do të pyetet është kush është personi që e kërcënon atë?”, tha deputeti i partisë Mundësia, Erald Kapri, duke iu referuar përgjimeve në dosje.
Kryeministri Edi Rama i është shmangur gjithashtu komenteve mbi çështjen e Ballukut dhe nuk i është përgjigjur pyetjeve nëse do ta shkarkonte atë nga detyra që të përballej me drejtësinë, sipas një standardi të vendosur nga vetë ai më herët për bashkëpunëtorë të tjerë kur janë hetuar nga drejtësia.
Sipas dosjes hetimore dhe mesazheve të shkëmbyera në Signal, zv.kryeministrja Belinda Balluku akuzohet se ka kontrolluar në çdo hap procedurën e prokurimit me vlerë 18.9 miliardë lekë për tunelin e Llogarasë dhe ka paracaktuar fituesin, në shkelje të kritereve standarde të tenderit.