Tragjedi në Bullgari: Gjashtë emigrantë humbin jetën pas ndjekjes policore, makina bie në liqen
Gjashtë emigrantë humbën jetën dhe katër të tjerë u plagosën si pasojë e një aksidenti të ndodhur gjatë një ndjekjeje policore pranë qytetit të Burgasit në Detin e Zi, raporton Agjencia Bullgare e Lajmeve (BTA).
Sipas zëdhënësit të Ministrisë së Brendshme, automjeti me targa rumune, i cili transportonte dhjetë persona, ra në një liqen pasi shoferi refuzoi të ndalonte për kontroll gjatë një ndjekjeje të zhvilluar mbrëmjen e 6 nëntorit.
Shefi i policisë kufitare, Anton Zlatanov, deklaroi për median “BTV” se policia tentoi të ndalonte makinën për herë të parë në orën 21:30, por shoferi nuk iu bind urdhrit.
Pas dy përpjekjeve të tjera për të ndaluar automjetin, makina doli nga rruga në hyrje të Burgasit dhe përfundoi në liqen. Gjashtë emigrantë vdiqën në vend, ndërsa shoferi rumun dhe tre emigrantë të tjerë mbijetuan dhe morën ndihmën e parë.
Të mbijetuarit dyshohet të jenë nga Afganistani.
Që nga viti 2015, vendet e Ballkanit janë shndërruar në pika tranziti për refugjatët dhe migrantët nga Lindja e Mesme, Afganistani, Azia dhe Afrika, të cilët kërkojnë të arrijnë shtetet anëtare të Bashkimit Evropian.
Autoritetet rumune ende nuk kanë konfirmuar zyrtarisht raportet mbi aksidentin fatal.