Sulm në Milano: 25-vjeçari sulmon turistë hebrenj në stacionin qendror
Një 25-vjeçar pakistanez është arrestuar nga Policia Hekurudhore në Stacionin Qendror të Milanos, pasi dyshohet për sulm me motive racore, etnike dhe fetare. Ngjarja ka shkaktuar panik në stacion.
Sipas informacioneve paraprake, i riu ka sulmuar fizikisht një grup turistësh hebrenj amerikanë, të cilët po prisnin trenin. Njëri prej tyre ka marrë lëndime në kokë dhe është dërguar në spital.
Falë ndërhyrjes së shpejtë të policisë dhe disa pasagjerëve, të cilët u përpoqën të ndalojnë sulmin dhe t’i ofrojnë mbrojtje viktimës, autori është neutralizuar dhe arrestuar menjëherë.
Pamjet nga kamerat e sigurisë tregojnë se 25-vjeçari fillimisht ka ofenduar viktimat dhe më pas ka kaluar në sulm fizik.
Autoritetet po vazhdojnë hetimet për të zbardhur të gjitha rrethanat e ngjarjes. I riu, i cili sapo kishte mbërritur në Milano me tren, ndodhet nën arrest dhe pritet të përballet me drejtësinë.