“`html
FOTO/ Çmontohet organizata kriminale e trafikut të drogës Itali-Spanjë, drejtuar nga shqiptarë
Dhjetë persona janë arrestuar dhe një sasi e konsiderueshme droge është sekuestruar, si pjesë e një rrjeti të organizuar kriminal të trafikut në Itali. Një pjesë e të arrestuarve janë shqiptarë, ndërsa organizata ishte ekstrakomunitare, e përbërë gjithashtu nga shtetas rumunë dhe italianë.
Gjatë operacionit u sekuestruan mbi 3 kilogramë kokainë dhe lëndë narkotike të tjera. Katër persona u ndaluan në dy ditët e fundit të aksionit, mes tyre një grua rumune dhe dy shqiptarë, ndërsa gjashtë të tjerë ishin arrestuar në fazat e para të operacionit.
Ky është rezultati i një operacioni të madh antidrogë të zhvilluar nga Policia e Shtetit Busto Arsizio, i cili çmontoi organizatën me drejtues shqiptarë, aktive mes Italisë dhe Spanjës, si dhe në provincën e Varese.
Në mëngjesin e së mërkurës, më 12 nëntor, ekipe të shumta nga stacionet e policisë Busto Arsizio dhe Gallarate, si dhe nga Shtabi i Policisë së Varese, me mbështetjen e tre njësive qensh të trajnuar për nuhatje droge dhe zbulimin e monedhave, iu drejtuan objektivave të operacionit. Këto objektiva ndodheshin në zonën e Varese, Alto Milanese dhe provincat e Pavia, Monza dhe Aosta.
Janë ekzekutuar urdhra paraburgimi të lëshuar nga Autoriteti Gjyqësor Busto Arsizio, duke çuar në arrestimin dhe ndalimin e shtatë shqiptarëve dhe një italiani. Brenda të njëjtit operacion, u kryen kontrolle edhe ndaj anëtarëve të tjerë të organizatës kriminale, duke rezultuar në arrestimin në flagrancë të një gruaje rumune, banuese në zonën Alto Milanese. Ajo u kap duke fshehur në banesën e saj 1.25 kilogramë hashash të ndarë në 13 doza, 155 gramë kokainë (përfshirë doza të gatshme për shitje), 36 gramë marihuanë dhe 24 gramë heroinë të ndarë në kapsula.
Gjithashtu, në bashkëpunim me Skuadrën Fluturuese të Aostës, u bë arrestimi i një shtetasi tjetër shqiptar, banues në atë provincë. Ai u kap duke fshehur në banesën e tij 650 gramë kokainë, 100 gramë hashash, një peshore precize, materiale paketimi dhe rreth 5,000 euro kesh.
Hetimi, i nisur rreth dy vite më parë nga stacioni i policisë së Busto Arsizio, filloi pas vëzhgimeve të thella të kryera për blerje kokaine nga disa shitës mes Busto Garolfo dhe Busto Arsizio. Ky hetim solli në identifikimin e bashkëpunëtorëve të tjerë të vendosur në të gjithë zonën, të cilët kishin kontakte të ngushta. U identifikuan automjete të regjistruara në emra të tjerë, shtëpi të përdorura si laboratorë për përgatitjen e drogës dhe disa restorante që shërbenin si pika kyçe për trafikun e drogës, përfshirë një në provincën e Milanos të menaxhuar nga gruaja rumune e arrestuar.
Gjatë hetimit, hetuesit zbuluan gjithashtu transitin e një ngarkese të konsiderueshme kokaine nga Spanja në Itali, duke përdorur një automjet të rëndë spanjoll, sipas mediave italiane. U arrestuan gjithashtu dy anëtarë të bandës kriminale, një shqiptar dhe një italian, të cilëve iu gjetën në posedim 240 gramë kokainë të ndarë në doza dhe një bllok prej 504 gramë kokainë.
“`