Gazetari ukrainas ndalon në Paris të quajturën “vajza e Putinit”: “Thuaji babait të ndalë luftën”
22-vjeçarja Luiza Rozova, e njohur si një nga vajzat e dyshuara të Vladimir Putinit, është shprehur se i vjen “vërtet keq” për luftën në Ukrainë. Ajo u përball me një gazetar ukrainas, vëllai i të cilit u vra së fundmi në një sulm rus me raketa.
Rozova e ka përshëndetur gazetarin për “guximin” për t’iu afruar, por më pas është larguar në rrugët e Parisit, ku banon aktualisht.
Dmytro Sviatnenko, gazetar i rrjetit ukrainas TSN, vëllai i të cilit, Volodymyr, humbi jetën në një sulm rus me raketë në nëntor, i kërkoi Luiza Rozovës të fliste me presidentin rus për t’i kërkuar ndalimin e gjakderdhjes.
Luiza, emri i vërtetë i së cilës besohet të jetë Elizaveta Krivonogikh, është fëmijë i dyshuar i një lidhjeje të Putinit me Svetlana Krivonogikh, një ish-pastruese e kthyer në multimilionere dhe bankiere 50-vjeçare.
Gazetari i tha vajzës së Putinit: “Tre javë më parë, babai yt vrau vëllain tim.” Ai e pyeti se si mund të jetojë ajo në Evropë, duke e cilësuar atë dhe vendin e saj si “të urryer” dhe “të mallkuar” nga Putin.
“Thuaj diçka! A i mbështet politikat e tij?”, e pyeti ai sërish. E veshur me një maskë, Luiza u përgjigj fillimisht: “Nuk të dhashë leje të më filmoje.”
Gazetari i kundërpërgjigj: “Epo, ju e dini, Kievi aktualisht është pa energji elektrike dhe ka alarm për sulme ajrore. As ne nuk dhamë lejen tonë për këtë. Çfarë mendoni për politikat e babait tuaj?”
“Çfarë lidhje ka kjo me mua?”, u përgjigj ajo.
“Epo, ai është babai yt. Të paktën, mund ta telefonosh tani dhe t’i thuash, ‘Babi, ndalo së bombarduari Kievin’.”
Luiza u përgjigj: “Epo, sigurisht.” Gazetari e nxiti: “Epo, provoje.” Ajo përsëriti: “Epo, sigurisht.” Më pas, Luiza u largua pa shtuar asnjë koment tjetër.