Të paktën 4 të vdekur në sulmin e ri amerikan ndaj një anijeje në Paqësor
Ushtria amerikane njoftoi se ka goditur një motoskaf që, sipas tyre, transportonte drogë në ujërat ndërkombëtare në Paqësorin lindor të enjten, duke lënë të vdekur katër persona në bord.
“Inteligjenca konfirmoi se anija po transportonte drogë dhe po lundronte përgjatë një rruge të njohur kontrabande në Paqësorin lindor”, thuhet në një postim të Komandës së Përbashkët të SHBA-së përgjegjëse për Amerikën e Jugut (SOUTHCOM) nëpërmjet Twitter-it, shoqëruar me një videoklip 21-sekondësh të deklasifikuar të sulmit ajror.
Sulmi i fundit vjen ndërsa Pentagoni dhe Shtëpia e Bardhë po përballen me pyetje në lidhje me bazën ligjore të fushatës për të vrarë trafikantë të dyshuar droge në operacione ushtarake. Ligjvënësit amerikanë janë zotuar të hetojnë sulmin e parë të këtij lloji, të ndodhur në shtator, gjatë të cilit dy persona, të cilët kishin mbetur të bllokuar nga rrënojat, u vranë në një sulm të mëvonshëm.
Sekretari i Mbrojtjes i SHBA-së, Pete Hegseth, është përballur me kritika në rritje për sulmin e 2 shtatorit, pasi një raport i Washington Post sugjeroi se ai kishte urdhëruar ushtrinë “t’i vriste të gjithë”. Admirali amerikan që drejtoi sulmin tha të enjten para ligjvënësve se nuk kishte pasur një urdhër të tillë. Megjithatë, demokrati Jim Himes e përshkroi videon e sulmit të shtatorit si “një nga gjërat më shqetësuese që kam parë në karrierën time në shërbimin publik”.
Që nga sulmi i parë i shtatorit, Shtetet e Bashkuara kanë kryer 21 sulme të ngjashme, duke rezultuar në më shumë se 80 vdekje.