Shmanget krizë e re politike në Francë, Asambleja Kombëtare miraton buxhetin e sigurimeve shoqërore për 2026
Asambleja Kombëtare Franceze ka miratuar seksionin e buxhetit të vitit 2026 për sigurimet shoqërore, me 247 vota pro, 234 kundër dhe 93 abstenime. Ky rezultat ka zbutur rrezikun e një tjetër krize qeveritare në vend.
Ky ishte segmenti më i debatueshëm i buxhetit, duke shkaktuar kundërshtime të forta politike mes forcave parlamentare deri në ditën e votimit.
Sipas analistëve francezë, votimi forcon dukshëm pozitën e Kryeministrit Sébastien Lecornu. Edhe pse nuk ka shumicën në Parlament, ai arriti të sigurojë miratimin e projektligjit përmes negociatave dhe kompromisit politik, duke shmangur përdorimin e një dekreti presidencial – një instrument që shpesh ka tensionuar klimën politike në Francë.
Në këtë votim:
- Ligjvënësit që mbështesin Presidentin Emmanuel Macron dhe Partinë Socialiste votuan kryesisht pro projektligjit.
- Kundër votuan Tubimi Kombëtar i ekstremit të djathtë dhe forcat radikale të majta të Francës së Panënshtruar.
- Deputetët e qendrës së djathtë, të gjelbërit dhe disa ish-mbështetës të Macron-it zgjodhën të abstenojnë.
“Kjo shumicë përgjegjësie tregon se kompromisi nuk është vetëm një slogan, por një rrugë që na lejon të ecim përpara në interesin e përgjithshëm”, shkroi Kryeministri Lecornu në platformën X, pasi rezultati u konfirmua.
Edhe pse shumë deputetë që votuan pro pranuan se disa dispozita të buxhetit nuk i kënaqin, ata theksuan se “buxheti ideal është i pamundur” dhe se “një buxhet i keq është më i mirë se mungesa e buxhetit”. Këto komente nënvizojnë nevojën për stabilitet politik dhe institucional në një periudhë të ndjeshme për Francën.