Starmer dhe aleatët evropianë diskutojnë planin e paqes për Ukrainën me Trump
Kryeministri britanik, Keir Starmer, presidenti francez Emmanuel Macron dhe kancelari gjerman Friedrich Merz kanë zhvilluar bisedime me presidentin amerikan, Donald Trump, mbi planet për paqen në Ukrainë. Këto bisedime vijnë në një kohë kur marrëdhëniet mes Shteteve të Bashkuara dhe Evropës po kalojnë një fazë tensionesh të larta.
Zyra e Starmer bëri të ditur se të gjithë udhëheqësit u shprehën dakord për rëndësinë kyçe të këtij momenti për të ardhmen e Ukrainës dhe për sigurinë euroatlantike.
Udhëheqësit diskutuan rreth procesit të bisedimeve të paqes të drejtuara nga SHBA-ja dhe mirëpritën përpjekjet për të arritur një paqe të drejtë dhe të qëndrueshme për Ukrainën, si dhe për t’i dhënë fund dhunës.
“Puna intensive për planin e paqes po vazhdon dhe do të shtrihet edhe në ditët në vijim,” deklaroi Starmer.
Tre udhëheqësit evropianë u takuan të hënën me presidentin ukrainas, Volodymyr Zelensky, në Londër për të diskutuar propozimet për t’i dhënë fund luftës. Shqetësimet lindën lidhur me planet fillestare të Uashingtonit, të cilat dyshohej se mbështetnin qëllimet e luftës ruse.
Ekipi i Zelensky pritet t’ia dorëzojë propozimet e tij më të fundit për paqe negociatorëve amerikanë. Ndërkohë, një takim i “koalicionit të të gatshmëve” – grupi i vendeve të udhëhequra nga Britania e Madhe dhe Franca, të cilat janë të përgatitura të mbështesin Ukrainën dhe të pengojnë Rusinë në rast armëpushimi – do të mbahet të enjten.
Donald Trump ka qenë kritik ndaj aleatëve evropianë të Ukrainës, duke i cilësuar ata si udhëheqës “të dobët” që nuk arrijnë të “prodhojnë” rezultate, ndërkohë që lufta vazhdon.
Zelensky shtoi se Ukraina do të zhvillojë bisedime me SHBA-në mbi planet për rindërtimin pas luftës dhe zhvillimin ekonomik.