Nga “masakra e Cërrikut” te “vrasja e Glinës”, Xholi rrëfen çështjet që ka hetuar
Kandidati për kreun e SPAK, Adnan Xholi, gjatë prezantimit të platformës së tij përpara Këshillit të Lartë të Prokurorisë (KLP), ka paraqitur karrierën e tij të gjatë në sistemin e drejtësisë, duke theksuar përvojën e tij në poste drejtuese.
“Prokuroria është një organ i decentralizuar, prokurorët janë të pavarur. Drejtuesi është një menaxher, i cili, si i barabartë mes të barabartëve, ka detyrimin ligjor dhe moral të sigurojë kushtet e punës, të orientojë burimet njerëzore dhe të godasë paligjshmërinë. Roli i drejtuesit fokusohet në arritjen e rezultateve të suksesshme, me qëllim rritjen e besimit të publikut dhe partnerëve ndërkombëtarë. Për shkak të strukturës dinamike të kriminalitetit, nevojitet një vëmendje e shtuar. Kjo trupë prokurorësh duhet të bëjë gjithçka që në përballje me opinionin publik të jetë e sigurt se po bën sa duhet.
Vijoj sot para jush me një eksperiencë mbi 27 vite pa shkëputje në sistemin e drejtësisë. Karriera ime ka pasur një ngritje konstante dhe të vazhdueshme. Kam udhëhequr disa hetime për një gamë të gjerë çështjesh të krimit të organizuar dhe të korrupsionit. Kam përfaqësuar prokurorinë në të gjitha shkallët e gjykimit dhe përpara se të bëhem pjesë e SPAK.
Për shkak të pozicionit që kam pasur si drejtor, kam qenë pjesë përbërëse e të gjitha vendimeve që do të merreshin nga Gjykata e Lartë. Qënia ime si prokuror, si drejtues në disa prokurori, më ka bërë të mundur që të kem aftësi në prodhimin e akteve administrative. Kam pasur parasysh të njihem me problematikat, me kolegët, për t’i dhënë zgjidhje. Kam udhëhequr hetime të rëndësishme. Jam drejtues i 5 skuadrave të përbashkëta hetimore.
Jam prokuror që kam pasur hetime paralele me shumicën e vendeve në rang global. Kam pasur hetime paralele përsa i përket çështjeve të lëndëve narkotike, armëve, pastrimit të parave dhe trafikimit të qenieve njerëzore. Kam bashkëpunuar me homologët e huaj për të goditur grupet kriminale me shtrirje të gjerë. Kam administruar akte voluminoze, është bërë i mundur arrestimi i autorëve, dënimi dhe konfiskimi e sekuestrimi i aseteve kriminale.
Jam angazhuar edhe në ndryshimin e reformës në drejtësi. Drejtuesi, krahas rolit menaxherial, duhet të japë shembull për marrjen përsipër të përgjegjësive të shtuara. Të qenurit drejtues në nivele të ndryshme të prokurorisë, më ka dhënë mundësinë që nga pikëpamja ligjore të thelloj njohuritë e mia, duke treguar një kujdes të veçantë në zbatimin e ligjit. Suksesi i prokurorit matet në gjykatë”, tha Xholi.
Ai tregoi edhe disa nga çështjet e bujshme që ka hetuar:
- “Jam emëruar në vitin 1999 si prokuror në Gjirokastër. Jam angazhuar në hetimin e çështjeve sensitive që kishin ndodhur në vitin 1997. Kam prezantuar rastin e vrasjes të quajtur si ‘vrasja e Glinës’ në vitin 1997. Një grup kriminal i armatosur me shtrirje në aksin Vorë-Tepelenë kishin krijuar mekanizëm për të grabitur shtetasit shqiptarë që punonin dhe jetonin në Greqi, dhe u zinin kurth në pikën kufitare. Njëri nga anëtarët hiqej si taksist dhe bashkëpunëtorët e prisnin në rrugë. Katër shtetas shqiptarë u vranë nga ky grup. Janë identifikuar autorët dhe janë dënuar të gjithë, për ekzekutorin kam kërkuar dënim të përjetshëm.”
- “Dy çështje të tjera kanë të bëjnë me rrëmbimin e biznesmenëve. Dy biznesmenë u rrëmbyen, një në fshatin Peshkopi dhe një në qytetin e Gjirokastrës. I rrëmbyen për një periudhë 9-18 ditë, ushtruan dhunë psikologjike dhe fizike, duke i detyruar të hapnin varrin e tyre me qëllim të merrnin shumën monetare të kërkuara, ishte 100 milionë lekë. Hetimi ishte pezulluar. E rihapi dhe u identifikuan, arrestuan dhe dënuan autorët.”
- “Rasti tjetër ka të bëjë me një pengmarrje, ku pengu u ekzekutua, por autorët vijuan të kërkonin para. U identifikua autori dhe u kërkua dënim përjetë për të.”
Ai kujtoi edhe disa prej ngjarjeve më të rënda që ka hetuar kur ishte pjesë e Prokurorisë së Krimeve të Rënda:
- “Ngjarjet e vitit ’97, të njohura si “masakra e Cërrikut”, ku janë vrarë 6 efektivë të Gardës dhe “masakra e Qafë Gjashtës”, ku u vra një efektiv policie dhe u tentua të vritet një drejtues policie. Ndodheshim në një presion të jashtëzakonshëm nga familjarët e të pandehurve, të cilët ndjeheshin të paprekshëm në qytetet e tyre, dhe nga familjarët e viktimave, që kërkonin drejtësi.”