Buxheti i vitit 2026 miratohet në Kuvend
Kuvendi miratoi pas mesnate buxhetin për vitin 2026, me 81 vota pro dhe 16 kundër.
Plani financiar i vitit të ardhshëm parashikon të ardhura prej rreth 8.5 miliardë euro dhe shpenzime afërsisht 8.9 miliardë euro, që përbëjnë rreth 31.9% të PBB-së.
Krahasuar me buxhetin e rishikuar të vitit 2025, shpenzimet do të rriten me rreth 550 milionë euro. Deficiti pritet të mbetet në nivelin 2.3% të PBB-së, po aq sa pritet të jetë edhe këtë vit.
Një pjesë e rëndësishme e buxhetit i dedikohet politikave sociale. Për vitin 2026, parashikohet një rritje e ndjeshme e mbështetjes financiare në këtë drejtim:
- 100 milionë euro për rritjen e pensioneve sipas skemës së re.
- 135 milionë euro për rimbursimin e medikamenteve.
Qeveria ka parashikuar gjithashtu fondet e nevojshme për zbatimin e pagës minimale prej 50 mijë lekësh në muaj.
Për herë të parë, parashikohet edhe indeksimi i pagave në administratën publike me 2.5%, i cili do të hyjë në fuqi më 1 janar 2026.
Investimet publike për vitin e ardhshëm arrijnë në rreth 1.9 miliardë euro, ndërsa fondi i rindërtimit do të jetë 50 milionë euro.
Për 11 projektet koncesionare janë parashikuar 120 milionë euro, një shumë pak më e ulët se një vit më parë.
Edhe për vitin 2026, prioritetet kryesore mbeten shëndetësia dhe mbrojtja sociale, infrastruktura dhe energjia, arsimi dhe ushtria.
Në ndarjen sipas institucioneve, buxheti më i madh i jepet Ministrisë së Shëndetësisë dhe Mirëqenies Sociale, me rreth 853 milionë euro, të cilat mbulojnë pagat dhe investimet në këtë sektor.
Ministria e Infrastrukturës dhe Energjisë përfiton rreth 800 milionë euro, të fokusuar kryesisht në projekte rrugore dhe hekurudhore.
Ministria e Arsimit ka një buxhet prej 680 milionë euro, i cili mbështet pagat e mësuesve dhe investimet në shkolla.
Ministria e Mbrojtjes merr rreth 610 milionë euro, kryesisht për forcimin e kapaciteteve të ushtrisë dhe për të përmbushur angazhimet e Shqipërisë në kuadër të NATO-s.