Kryeministri izraelit Benjamin Netanyahu u takua në Jerusalemin perëndimor me të dërguarin e Shteteve të Bashkuara Tom Barrack për të diskutuar fazën e dytë të një marrëveshjeje armëpushimi në Gaza.
Zyra e Netanyahut publikoi një video ku shihet pritja e Barrack, përpara një takimi ku morën pjesë zyrtarë nga të dyja palët. “Dialog konstruktiv që punon drejt paqes dhe stabilitetit rajonal”, shkroi Barrack në platformën X.
Transmetuesi publik i Izraelit e cilësoi vizitën e Barrack-ut, kohëzgjatja e së cilës nuk u specifikua, si “shumë të ndjeshme”, duke shtuar se ajo pasqyronte shqetësimin në rritje të Presidentit të SHBA-së Donald Trump për ngecjen e tranzicionit drejt fazës tjetër të planit të tij për Gazën.
Sipas transmetuesit, i dërguari amerikan ka planifikuar të takohet gjithashtu me zyrtarë të lartë politikë dhe të sigurisë për të vlerësuar gatishmërinë e Izraelit për të avancuar drejt fazës së dytë, mes presionit në rritje nga SHBA.
“Thelbi i vizitës së Barrack përqendrohet te Gaza dhe kalimi në fazën e dytë të planit amerikan, i cili synon të zëvendësojë armëpushimin e përkohshëm dhe të brishtë me marrëveshje më të qëndrueshme sigurie dhe politike”, raportoi KAN. Sipas tyre, plani i SHBA-së përfshin krijimin e një force ndërkombëtare stabilizimi të udhëhequr nga SHBA-të, që synon çmontimin gradual të aftësive ushtarake të Hamasit dhe krijimin e një autoriteti alternativ në enklavë.
Transmetuesi, duke cituar burime politike izraelite të paidentifikuara, raportoi se vizita e Barrack-ut “nuk shihet si një vizitë rutinë protokollare”. “Është një hap i drejtpërdrejtë përgatitor për takimin e pritur midis Netanyahut dhe Trump” në Florida më 29 dhjetor, thanë burimet.
Të dielën, udhëheqësi i Hamasit Khalil al-Hayya deklaroi se roli i forcave ndërkombëtare dhe i këshillit të paqes të propozuar në Gaza do të kufizohej në mbështetjen dhe ruajtjen e marrëveshjes së armëpushimit, si dhe në mbikëqyrjen e rindërtimit, pa ndërhyrje në punët e brendshme.
Në tetor 2023, Izraeli ka shkaktuar dëme duke vrarë rreth 70,700 persona, kryesisht gra dhe fëmijë, dhe duke plagosur mbi 171,100 të tjerë në sulmet në Gaza. Faza e parë e marrëveshjes së armëpushimit, e cila hyri në fuqi më 10 tetor, përfshin lirimin e pengjeve izraelite në këmbim të të burgosurve palestinezë. Plani parashikon gjithashtu rindërtimin e Gazës dhe krijimin e një mekanizmi të ri qeverisës pa Hamasin.