Takimi Trump-Netanyahu në Florida për hapat e ardhshëm në Gaza
Hapat e ardhshëm për Rripin e Gazës pritet të diskutohen më vonë gjatë ditës në Florida, ku do të mbahet një takim mes zyrtarëve amerikanë, katarë, egjiptianë dhe turq. Presidenti i SHBA-së, Donald Trump, pritet të presë Kryeministrin izraelit, Benjamin Netanyahu, në ditët në vijim.
Uashingtoni do të përfaqësohet në bisedimet e sotme nga i dërguari special i presidentit amerikan, Steve Witkoff, sipas një burimi pranë administratës Trump për AFP.
“Nuk e kemi planifikuar zyrtarisht ende, por Z. Netanyahu dëshiron të më takojë”, ka thënë presidenti republikan, duke shtuar se “Ai ndoshta do të vijë të më takojë në Florida”. Donald Trump planifikon të kalojë festat e fundvitit në rezidencën dhe klubin e tij Mar-a-Lago.
Katari dhe Egjipti, të cilët kanë qenë ndërmjetës dhe garantues të armëpushimit në enklavën palestineze, kohët e fundit bënë thirrje për zbatimin e një plani të propozuar nga presidenti amerikan për kalimin në fazën tjetër. Kjo fazë përfshinte çarmatimin e Hamasit, një mundësi që lëvizja islamiste palestineze e refuzon, tërheqjen progresive të ushtrisë izraelite nga e gjithë enklava, krijimin e autoriteteve kalimtare dhe vendosjen e një force ndërkombëtare për “stabilizim”.
Armëpushimi në Rripin e Gazës mes Izraelit dhe Hamasit, i cili hyri në fuqi më 10 tetor, mbetet shumë i brishtë. Të dyja palët akuzojnë njëra-tjetrën për shkelje flagrante të kushteve, ndërsa situata humanitare në enklavë vazhdon të jetë kritike.
Megjithatë, presidenti amerikan u shpreh të mërkurën në një deklaratë se kishte rivendosur paqen në Lindjen e Mesme “për herë të parë në tre mijë vjet”.
Turqia do të përfaqësohet në bisedime nga Ministri i Jashtëm, Hakan Fidan. Në një fjalim, Presidenti turk, Rexhep Tajip Erdogan, siguroi se vendi i tij mbetet “vendosmërisht në anën e palestinezëve”.