Aksident në Bradashesh, katër persona përfundojnë në spital
Një aksident i rëndë rrugor është regjistruar mbrëmjen e sotme, rreth orës 20:10, në aksin rrugor që lidh rreth-rrotullimin e Bradasheshit me Paraburgimin e Elbasanit. Dy automjete janë përplasur me njëra-tjetrën, duke shkaktuar bllokim të përkohshëm të qarkullimit në këtë segment.
Sipas të dhënave paraprake, aksidenti dyshohet të ketë ndodhur si pasojë e një manovre parakalimi të gabuar nga njëri prej automjeteve të përfshira, çka ka sjellë përplasjen e fortë mes mjeteve.
Si pasojë e aksidentit, drejtuesit e të dy automjeteve, si edhe dy pasagjerë, kanë mbetur të plagosur. Të lënduarit janë transportuar me urgjencë drejt spitalit për ndihmë mjekësore, ndërsa gjendja e tyre shëndetësore po monitorohet nga personeli mjekësor.
Në vendngjarje mbërritën menjëherë shërbimet e policisë dhe ambulancat, të cilat po punojnë për zbardhjen e plotë të rrethanave të aksidentit dhe normalizimin e qarkullimit rrugor.