Policia e Tiranës shqipton gjoba masive (Shifrat zyrtare)
Policia Rrugore e Tiranës ka bërë të ditur një raport me shifra të larta gjobash të shqiptuara ndaj qytetarëve që drejtojnë automjete. Vetëm gjatë javës së kaluar, 4,744 drejtues mjetesh janë gjobitur për shkelje të rregullave të qarkullimit rrugor. Mes shkeljeve më të shpeshta janë përdorimi i celularit gjatë drejtimit, tejkalimi i shpejtësisë së lejuar dhe parakalimet e gabuara.
Gjithashtu, 32 shoferë janë arrestuar ose do të hetohen në gjendje të lirë. Ndërkohë, 53 automjete janë bllokuar në kuadër të këtij operacioni.
Detaje nga Policia Rrugore:
- Gjatë javës që lamë pas dhe fundjavës, shërbimet e Policisë Rrugore kanë intensifikuar kontrollet dhe patrullimet në të gjitha akset kryesore të kryeqytetit. Këto veprime janë marrë në kuadër të afrimit të festave të fundvitit dhe shtimit të fluksit të lëvizjes, me qëllim kryesor parandalimin e aksidenteve dhe ruajtjen e sigurisë në rrugë.
- Falë prezencës së shtuar dhe përdorimit të pajisjeve bashkëkohore, janë konstatuar një sërë shkeljesh rrugore të rrezikshme, për të cilat janë marrë masat administrative si më poshtë:
- Qarkullim me shpejtësi mbi normat e lejuara: 1838 masa
- Përdorimi i celularit gjatë drejtimit të mjetit: 1207 masa
- Mosvendosje e rripit të sigurimit: 722 masa
- Mosvendosje e kaskës mbrojtëse: 653 masa
- Mosrespektim i radhës së qarkullimit: 250 masa
- Parakalim i gabuar: 74 masa
- Për shkelje të rënda të Kodit Rrugor dhe vepra penale në fushën e qarkullimit rrugor:
- Janë arrestuar/proceduar penalisht 32 shtetas.
- Janë bllokuar 53 automjete.
Policia Rrugore i bën sërish apel të gjithë drejtuesve të mjeteve dhe përdoruesve të tjerë të rrugës që të respektojnë rregullat e qarkullimit. Ky respektim përbën një kontribut të rëndësishëm për garantimin e sigurisë rrugore dhe mbrojtjen e jetës.