Tragjedi në azilin e të moshuarve, dy të vdekur dhe disa të zhdukur
Një zjarr i fuqishëm, i shoqëruar nga një shpërthim, shkatërroi Qendrën e Shëndetit dhe Rehabilitimit në Bristol Township, në periferi të Filadelfias. Autoritetet dyshojnë se shkaku mund të ketë qenë një rrjedhje gazi.
Zjarrfikësit dhe stafi i emergjencës punuan me shpejtësi për të evakuuar të moshuarit, duke përdorur dritaret, shkallët dhe ashensorët për t’i nxjerrë jashtë nga ndërtesa e dëmtuar.
Guvernatori i Pensilvanisë, Josh Shapiro, raportoi se dy persona kanë humbur jetën dhe pesë të tjerë rezultojnë të zhdukur. Numri përfundimtar i të plagosurve nuk është ende i qartë, pasi shumë pacientë u transportuan në spitale të ndryshme.
Shefi i zjarrfikësve, Kevin Dippolito, përshkroi shpërthimin si “shumë katastrofik”. Ai shtoi se rreth 15-30 sekonda pas daljes së zjarrfikësve nga godina, ndodhi një shpërthim tjetër i fuqishëm që rrezikoi ekipet e shpëtimit.
Përveç dëmeve nga zjarri, kati i parë i ndërtesës u shemb pjesërisht në bodrum. Dippolito theksoi përpjekjet heroike të oficerëve dhe fqinjëve, duke përshkruar skena ku njerëz nxirreshin nga dritaret dhe mbanin mbi supe për t’i shpëtuar. Një oficer policie madje mbajti dy persona mbi supe për t’i dërguar në vend të sigurt.
Shkolla e Mesme Harry S. Truman po shfrytëzohet si qendër strehimi.
Ekipet e emergjencës raportuan se shpërthimi dhe zjarri i dytë ndihmuan në identifikimin e burimit të rrjedhjes së gazit në bodrum dhe parandalimin e përhapjes së tij në pjesët e tjera të ndërtesës.
Guvernatori Shapiro vlerësoi reagimin e ekipeve të emergjencës, duke e quajtur heroik dhe duke theksuar profesionalizmin e tyre në situata shumë të rrezikshme.
Qendra kishte ndryshuar pronësinë pak javë më parë, dhe Departamenti i Shëndetësisë së Pensilvanisë kishte hartuar një plan për të përmirësuar standardet e sigurisë në objekt.
Hetimet për shpërthimin dhe për personat e zhdukur vazhdojnë, ndërsa autoritetet lokale dhe kompanitë e shërbimeve po bashkëpunojnë për të sqaruar shkakun e incidentit.