Familja shuhet në një aksident tragjik në Teksas gjatë kthimit nga festa e Krishtlindjeve; mbijeton vetëm 3-vjeçari.
Një ngjarje e rëndë ka tronditur Teksasin, Shtetet e Bashkuara, ku tre anëtarë të një familjeje humbën jetën pasi automjeti i tyre u godit nga një shofer i dehur gjatë kthimit nga një festë Krishtlindjeje.
Viktimat janë:
- Diego Pena Jr., 26 vjeç
- Lizbeth Rodriguez Contreras, bashkëshortja 27-vjeçare
- Camila Pena, vajza e tyre 5-vjeçare
I vetmi mbijetuar nga ky aksident tragjik është djali i tyre 3-vjeçar, Diego, i cili ndodhet nën kujdes mjekësor.
Aksidenti ndodhi rreth orës 02:00 të mëngjesit të së shtunës në një autostradë të Teksasit. Sipas autoriteteve policore, përplasja u shkaktua nga 27-vjeçarja Majesty Faith Lee, e cila dyshohet se ishte nën ndikimin e alkoolit dhe ka kaluar në korsinë e kundërt të lëvizjes.
Nëna dhe vajza kanë ndërruar jetë menjëherë në vendngjarje. Diego Pena Jr. u transportua në spital në gjendje të rëndë, por më vonë humbi jetën si pasojë e plagëve të marra.
Shoferja e dyshuar është arrestuar dhe aktualisht ndodhet në burgun e Qarkut Fort Bend, me një garanci prej 1.050.000 dollarësh.
Ndërkohë, 3-vjeçari po merr trajtim mjekësor në spital dhe pritet t’i nënshtrohet një ndërhyrjeje kirurgjikale për shkak të plagëve. Gjendja e tij shëndetësore raportohet si e qëndrueshme.
Duke komentuar ngjarjen, sherifi i Qarkut Fort Bend, Eric Fagan, theksoi se kjo tragjedi shërben si një paralajmërim i fortë për pasojat e drejtimit të automjetit nën ndikimin e alkoolit.
“Kjo është një kujtesë e dhimbshme se sa shpejt mund të ndryshojë jeta kur ngasim nën ndikimin e alkoolit dhe pse është thelbësore të bëjmë zgjedhje të përgjegjshme,” deklaroi ai.