Shqipëria përmbytet, Edi Rama ironizon nga zyra e tij në Kryeministri
Situata e krijuar nga përmbytjet vijon të jetë kritike në disa qarqe të vendit, pas reshjeve të dendura të shiut që nisën të martën dhe zgjatën gjatë gjithë natës. Pamjet nga terreni tregojnë makina të zhytura në ujë mes qendrave urbane, të cilat kaluan në kolaps për shkak të reshjeve të shumta. Rrugët janë mbuluar nga balta dhe inertet, shtëpi dhe biznese janë përmbytur, automjete janë shkatërruar, familje janë evakuuar me urgjencë dhe zona të tëra janë izoluar nga rrëshqitjet e dheut.
Durrësi nën ujë
Në Durrës, bilanci paraprak flet për të paktën 800 banesa të përmbytura dhe mbi 300 persona të evakuuar. Megjithëse situata duket më e qetë sot, problemet mbeten të theksuara në periferi dhe veçanërisht në zonën e ish-Kënetës, ku uji ka hyrë në shtëpitë e banorëve.
Burgu i Durrësit i përmbytur
Uji nuk është tërhequr ende, ndërsa në burgun e Durrësit oborri dhe kati i parë i godinës vijojnë të jenë nën ujë. Pamjet me gomone brenda institucionit flasin për një situatë të paprecedentë.
Gjirokastra, zonë e goditur rëndë
Gjirokastra paraqitet si një nga zonat më të goditura. Në lagjen “18 Shtatori”, dhjetëra biznese, banesa dhe makina janë dëmtuar rëndë, ndërsa lumenjtë dhe përrenjtë kanë sjellë masivisht gurë dhe inerte në rrugë e dyqane, duke krijuar një situatë që banorët e përshkruajnë si apokaliptike. Akset rrugore drejt Kakavijës dhe Valarës janë bllokuar, duke izoluar zona të tëra.
Situata në Lezhë, Kurbin dhe Kukës
Lezha dhe Kurbini kanë pasur një përmirësim relativ gjatë natës, por Laçi dhe disa fshatra vijojnë të jenë të rrethuar nga uji. Në Kukës, situata është edhe më e rëndë. Dhjetëra fshatra janë të bllokuara për shkak të rrëshqitjeve masive të dherave. Në njësinë administrative Zapot, të tre rrugët lidhëse me qytetin janë të pakalueshme.
Reagimi ironik i Kryeministrit Rama
Kësaj situate të vështirë për mijëra shqiptarë, i është shtuar një reagim ironik nga kryeministri Edi Rama, i cili sipas artikullit, ka vite që nuk del nga zyra në raste emergjencash, duke shmangur përgjegjësinë nga vetja dhe administrata që ai drejton. Rama e krahasoi situatën në Shqipëri me përmbytjet në vende të tjera të rajonit dhe Europës, ku sipas tij, opozitat atje nuk akuzojnë qeveritë e tyre për menaxhimin e keq të situatës.
“Nuk e kuptoj pse nuk po më fajësojnë akoma mua, qeverinë dhe bashkinë e Durrësit, për reshjet mbytëse të këtyre ditëve në Itali, Greqi, Mal të Zi, Kroaci e me radhë… Çudi e madhe opozitat andej, po të paktën të fajësonin qeveritë e tyre, po hiç, asnjë llaf”, shkruan Rama.
Për kryeministrin, përmbytjet janë një fenomen natyror që ndodh kudo, edhe në vendet e tjera të rajonit, ndaj qeveria shqiptare nuk ka pse mban asnjë përgjegjësi. Sipas Ramës, nëse bie shi edhe në Itali apo Greqi, atëherë gjithçka që ndodh në Shqipëri është e justifikuar.
Artikulli vë në dukje se ky qëndrim i Ramës është i ndryshëm nga deklaratat e tij kur ishte në opozitë. Atëherë ai fajësonte kanalizimet, urbanizimin pa plan, ndërtimet mbi lumenj e përrenj, mungesën e mirëmbajtjes së infrastrukturës dhe reagimin e dobët të institucioneve, përfshirë këtu edhe qeverinë. Asokohe, kryeministri e shihte problemin tërësisht tek njerëzit që ishin në pushtet, ndërsa sot kalon nga përgjegjësia te ironia.
Artikulli përmend gjithashtu se në zgjedhjet e kaluara banorët e Durrësit i besuan Partisë Socialiste 8 mandate deputetësh dhe mbi 80 mijë vota, pas një fushate që u premtoi investime të mëdha për qytetin.