Titulli: Banorët e ish-Kënetës në protestë, kërkojnë dëmshpërblim për banesat e përmbytura
Një grup banorësh të zonës së ish-Kënetës në Durrës kanë protestuar për të kërkuar ndihmën e institucioneve shtetërore, pasi banesat e tyre janë ende të përmbytura si pasojë e reshjeve të dendura të shiut.
Banorët raportojnë se kanalet kulluese janë të bllokuara dhe se niveli i ujit në oborret dhe në banesat e tyre arrin mbi 30 centimetra. Ata shprehen se deri më tani askush nuk ka shkuar për t’i ofruar ndihmë.
“Uji nuk po tërhiqet, ata nuk po e heqin ujin nga rrugicat dhe nga banesat, sepse dëmet janë shumë të mëdha,” tha një banor. “Të vijnë të na shohin, sepse jemi në mëshirë të fatit,” shtoi një tjetër.
Banorët shprehen të pakënaqur me mungesën e reagimit:
- “Askush nuk ka ardhur nga grupet e verifikimit për të parë situatën.”
- “Jemi të izoluar nga uji.”
- “Nuk po na ndihmon askush.”
Një banor tjetër theksoi se edhe më parë janë përmbytur dhe nuk kanë marrë dëmshpërblim, pavarësisht premtimeve.
“Ankesa ime është ndaj shtetit dhe Edi Ramës. Kërkoj ndihmë. Jam i përmbytur, me familje prej 4 personash. Uji arrin deri në 30 cm. Nuk ka zgjidhje. Kjo situatë nuk prek vetëm mua, por edhe të tjerë. Është hera e dytë që përmbytemi dhe nuk kemi marrë dëmshpërblim,” u shpreh një banor.
Një tjetër banor shtoi:
“Na kanë premtuar, na kanë thënë ‘hapni llogari’ dhe pastaj asgjë. Nata e mbrëmshme ka qenë stresuese, të jetosh me ujë në shtëpi dhe me fëmijë të sëmurë. Ne paguajmë taksat, plotësojmë detyrimin ndaj shtetit, por kërkojmë që të na bëjnë shërbimin. Nuk kam takuar askënd. I kam marrë në telefon dhe nuk e kanë marrë fare seriozisht.”
Një tjetër banor komentoi me hidhërim situatën duke pyetur nëse e gjithë qeveria është “kriminela”.