Përmbytjet dhe një viktimë: Prokuroria e Durrësit kërkon hetim për shpërdorim detyre
Prokuroria e Durrësit ka kërkuar nisjen e hetimeve për përmbytjet në qytetin e Durrësit. Hetimet kanë filluar pas reshjeve të shiut të datave 6 dhe 7 janar, periudhë gjatë së cilës janë shkaktuar disa përmbytje në rrugët e qytetit dhe zonat përreth.
Siç thuhet në dokument, situata e krijuar ka penguar procesin mësimor dhe mjekësor, si dhe ka vështirësuar përdorimin e rrugëve urbane dhe kombëtare. Përmbytja e banesave ka rrezikuar jetën e qytetarëve.
Dokumenti thekson se këto ngjarje japin të dhëna të mjaftueshme për ekzistencën e një fakti penal. Kryeprokurorja Suela Beluli, në urdhrin e nisjes së hetimeve, sipas raportimit të Anila Hoxhës, ka theksuar se hetimet do të fokusohen mbi shkaqet e këtyre pasojave, të cilat dyshohet se vijnë nga mospërmbushja e detyrës për shkak të mosfunksionimit të hidrovorit.
Në urdhrin e Prokurorisë përmendet se pasojë e drejtpërdrejtë e përmbytjeve ka qenë vdekja e një punonjësi të ndërmarrjes komunale plazh. Ky shtetas kishte shkuar në zonë për të vlerësuar situatën nga afër dhe dyshohet se ka humbur jetën për shkak të rrjedhës së ujit.
Për këtë arsye, Prokuroria dyshon se duhet të hetohet për shpërdorim detyre ndaj personave përgjegjës për mirë
Prokuroria e konsideron të arsyeshme hetimin për veprën penale të shkatërrimit të pronës me përmbytje dhe shkatërrimit të pronës nga pakujdesia. Ndaj, kryeprokurorja ka kërkuar administrimin e të gjitha akteve dokumentare të nevojshme dhe marrjen në pyetje të personave që kanë njohuri për ngjarjen.