Televizioni shtetëror i Iranit ka raportuar për herë të parë mbi protestat masive që kanë tronditur vendin, duke akuzuar “elementë terroristë” të mbështetur nga Shtetet e Bashkuara dhe Izraeli për nxitjen e trazirave.
Raporti i shkurtër, i transmetuar në edicionin e mëngjesit të lajmeve në orën 8:00, deklaroi se protestat ishin kthyer në dhunë, duke sjellë viktima, por pa specifikuar numrin e tyre. I njëjti raport shtoi se “makina private, motoçikleta, vende publike si metroja, kamionë zjarrfikës dhe autobusë” ishin djegur gjatë protestave.
Qeveria iraniane ka bllokuar internetin dhe thirrjet telefonike ndërkombëtare, duke vështirësuar komunikimin e mediave të huaja me qytetarët brenda Republikës Islamike të Iranit.
Protestat dhe sfidat ndaj autoritetit në Iran, të cilat filluan 13 ditë më parë, po rriten vazhdimisht në intensitet, siç dëshmohet nga videot e natës së kaluar që po qarkullojnë në internet.
Turma demonstruesish përshkuan një rrugë kryesore në verilindje të Teheranit të enjten në mbrëmje, sipas videove të publikuara në mediat sociale, autenticiteti i të cilave u verifikua nga Agence France-Presse. Imazhet tregonin shumë protestues në këmbë dhe të tjerë që binin borive të makinave që kishin zënë një pjesë të Avenysë Ayatollah Kassani.
Rrjetet televizive persiane me seli jashtë Iranit dhe mediat e tjera sociale transmetuan gjithashtu pamje të demonstratave të mëdha në qytete të tjera, përfshirë Tabrizin, në veri, dhe qytetin e shenjtë të Mashhadit, në lindje.
Reza Pahlavi, djali i Shahut të ndjerë të Iranit, postoi në X se “miliona iranianë kërkuan lirinë e tyre sonte”. Ai, i konsideruar nga shumë si figura kryesore e opozitës iraniane, u bëri thirrje qytetarëve të vendit të vazhdonin mobilizimin në orën 8:00 të mbrëmjes (ora lokale) të premten.