“`html
Kërkesat për azil nga shqiptarët në BE rriten sërish në tetor, duke arritur nivelin më të lartë që nga janari.
Kërkesat e shtetasve shqiptarë për azil në vendet e Bashkimit Europian kanë shënuar një tendencë rritëse në fundin e vitit të kaluar, pas rënies së tyre gjatë periudhës së verës. Sipas të dhënave të publikuara nga INSTAT, në tetor 2025 u regjistruan gjithsej 505 kërkesa për azil, duke shënuar nivelin më të lartë që nga muaji janar. Ky shifër shënon një rritje krahasuar me gushtin, kur numri i kërkesave ra në 315.
Pavarësisht rritjes së tetorit, për 10-mujorin 2025, aplikimet për mbrojtje ndërkombëtare kanë qenë në rënie. Për periudhën janar-tetor, gjithsej 4345 persona kërkuan azil, me një rënie prej 29.5% në krahasim me të njëjtën periudhë të një viti më parë. Në raport me vitin 2022, kur u shënua një kulm i ri emigracioni pas pandemisë me 11 mijë aplikime për 10-mujorin, tashmë aplikimet janë më se përgjysmuar.
Franca vijon të mbetet vendi më i preferuar për të kërkuar azil, falë politikave sociale të saj, e ndjekur nga Gjermania. Ndërkohë, teksa kërkesat për azil për 10-mujorin janë në rënie, të dhënat e tjera nga Eurostat tregojnë se forma më e preferuar për emigrim janë lejet e punës. Eurostat raportoi se vetëm në periudhën 2022-2024 janë dhënë mesatarisht 20 mijë leje pune në vit, kryesisht në Itali, Greqi dhe Gjermani, krahasuar me rreth 3-4 mijë që jepeshin një dekadë më parë. Që nga viti 2021, Bashkimi Europian ka dhënë rreth 72 mijë leje qëndrimi për herë të parë për arsye punësimi për shtetasit shqiptarë. Numri i atyre që largohen me leje pune është tashmë gati dy herë më i lartë se ata që kërkojnë të largohen përmes azilit.
Të dhënat e Eurostat tregojnë se në vitin 2022 kishte 15 mijë kërkesa për azil nga shtetasit shqiptarë në vendet e BE-së, në vitin 2023 numri i tyre zbriti në 11 mijë dhe në vitin 2024 ishte 9.3 mijë.
Europa në tetor 2025:
- 62,010 aplikantë për herë të parë (shtetas jo nga BE) aplikuan për mbrojtje ndërkombëtare në vendet e BE, një rënie prej 28% krahasuar me tetorin 2024 (86,470) dhe një rritje prej 6% krahasuar me shtatorin 2025 (58,495).
- U regjistruan gjithashtu 14,495 aplikantë të përsëritur, një rritje prej 80% krahasuar me tetorin 2024 (8,075) dhe një ulje prej 10% krahasuar me shtatorin 2025 (16,185).
Grupi më i madh i azilkërkuesve nga Venezuela:
- Në tetor 2025, venezuelianët ishin grupi më i madh i personave që kërkuan azil (8,140 aplikantë për herë të parë), të ndjekur nga afganët (5,920), bangladeshasit (3,400) dhe sirianët (2,915).
Spanja, Italia, Franca dhe Gjermania morën 74% të aplikantëve për herë të parë:
- Spanja (12,885), Italia (12,650), Franca (11,245) dhe Gjermania (8,815) regjistruan numrin më të lartë të aplikantëve për azil për herë të parë, duke përfaqësuar 74% të të gjithë aplikantëve për herë të parë në BE.
- Në tetor 2025, kishte 13.8 aplikantë për herë të parë për azil për çdo 100 mijë banorë në BE.
- Normat më të larta të aplikantëve për herë të parë u regjistruan në Greqi (58.1), Qipro (33.9) dhe Spanjë (26.3), krahasuar me popullsinë e secilit vend të BE-së (më 1 janar 2025).
1,710 të mitur të pashoqëruar aplikuan për azil:
- Në tetor 2025, gjithsej 1,710 të mitur të pashoqëruar aplikuan për herë të parë për azil në BE.
- Numri më i lartë i të miturve të pashoqëruar vinte nga Somalia (245), Egjipti (215), Eritrea (200), Afganistani (190) dhe Venezuela (180).
- Vendet e BE-së që morën numrin më të lartë të aplikimeve për azil nga të mitur të pashoqëruar ishin Holanda (350), Greqia (325), Gjermania (245) dhe Spanja (215).
Burimi: Eurostat
“`