“`html
SHBA pezullon vizat e emigracionit për Shqipërinë dhe Kosovën nga 21 janari, Ambasada Amerikane në Tiranë: Ja cilët qytetarë nuk lejohen të hyjnë në SHBA
Publikuar më 15.01.2026
Pas pezullimit të lotarisë amerikane, Departamenti i Shtetit (DASH) ka njoftuar ndalimin e dhënies së vizave të emigracionit për Shqipërinë duke filluar nga data 21 janar. Një memorandum i Departamentit të Shtetit, të cilin Fox News Digital e ka parë fillimisht, udhëzon zyrtarët konsullorë të refuzojnë vizat sipas ligjit ekzistues, ndërkohë që departamenti po rishikon procedurat e kontrollit dhe verifikimit.
Pezullimi do të hyjë në fuqi më 21 janar dhe do të vazhdojë pa afat të caktuar, derisa departamenti të kryejë një rivlerësim të procesimit të vizave të emigracionit. Në nëntor 2025, një komunikatë e Departamentit të Shtetit, e dërguar në përfaqësitë diplomatike në mbarë botën, udhëzonte zyrtarët konsullorë të zbatonin rregulla të reja gjithëpërfshirëse të kontrollit, bazuar në të ashtuquajturën dispozitë “public charge” të ligjit të emigracionit.
Udhëzimi kërkon që zyrtarët konsullorë të refuzojnë vizat për aplikantët që vlerësohet se ka gjasa të mbështeten në përfitime publike. Kjo vlerësim merr në konsideratë një gamë të gjerë faktorësh, përfshirë shëndetin, moshën, njohuritë e gjuhës angleze, gjendjen financiare dhe madje edhe nevojën e mundshme për kujdes mjekësor afatgjatë. Aplikantët më të moshuar ose mbipeshë mund të refuzohen, ashtu si edhe ata që kanë pasur ndonjë përdorim të mëparshëm të ndihmës financiare shtetërore ose janë institucionalizuar.
“Departamenti i Shtetit do të përdorë autoritetin e tij të hershëm për të shpallur të papërshtatshëm emigrantët e mundshëm që do të bëheshin barrë publike për Shtetet e Bashkuara dhe do të shfrytëzonin bujarinë e popullit amerikan,” tha në një deklaratë zëdhënësi i Departamentit të Shtetit, Tommy Piggott.
Sipas Fox News, Shqipëria është një nga 75 vendet në listën e vendeve për të cilat do të pezullohet shqyrtimi i vizave për emigrantët duke filluar nga data 21 janar. Gazetarja Keida Kostreci, në një lidhje live për ‘Top Story’, u shpreh se vende si Shqipëria dhe Kosova kanë një emigracion të lartë në SHBA për shkak të gjendjes së institucioneve, korrupsionit dhe mungesës së shpresës.
“Shumica e vendeve në listë ishin pjesë e asaj liste që doli para disa javësh, ku shtetasit e vendeve të caktuara merrnin më shumë ndihma sociale në SHBA. SHBA me këto vende mund të ketë marrëveshjen e vet. SHBA dhe Meksika, për shembull, kanë marrëveshje që mund t’i zgjidhin këto punë. Emrat e vendeve në këtë listë nuk janë konfirmuar ende nga Departamenti i Shtetit, por fakti që doli nga Fox News dhe pastaj u shpërnda nga Leavvit, do të thotë që është e saktë. E para, unë shikoj një përputhje me listën e mëparshme ku emigrantët nga Shqipëria dhe Kosova merrnin ndihma ekonomike. Departamenti e ka thënë që kjo bëhet për të mbrojtur taksapaguesit amerikanë, por nëse ka një emigracion kaq të madh, kjo ka të bëjë me situatën nga këto vende ku ndodh ky emigracion. Nga Shqipëria dhe Kosova ka prirje të madhe emigrimi dhe disa arsye janë gjendja e institucioneve demokratike, korrupsioni dhe mungesa e shpresës,” u shpreh gazetarja Keida Kostreci.
Ambasada e SHBA-së në Tiranë ka sqaruar se cilët qytetarë shqiptarë mund të udhëtojnë drejt SHBA-së dhe cilat kategori janë të ndaluara. Sipas njoftimit të ambasadës amerikane, shqiptarët që disponojnë vizë amerikane lejohen të udhëtojnë drejt SHBA-së vetëm nëse kanë për qëllim turizmin, pushimet, blerjet, takime biznesi apo vizitë te miqtë e të afërmit. Ambasada thekson se nuk lejohet udhëtimi drejt SHBA-së me qëllim lindjen e fëmijës, studimi për një diplomë apo me qëllim pune.
Njoftimi nga ambasada:
Është përgjegjësia juaj ta përdorni vizën tuaj në mënyrë korrekte.
Disa aktivitete që LEJOHEN me vizë vizitori B1/B2:
- ✅ Turizëm
- ✅ Pushime
- ✅ Blerje
- ✅ Vizitë me miq ose të afërm
- ✅ Takime me bashkëpunëtorë biznesi
- ✅ Pjesëmarrje në një konventë ose konferencë
Aktivitete që NUK LEJOHEN me një vizë vizitori B1/B2:
- ❌ Turizëm lindjeje (udhëtim me qëllim kryesor lindjen në Shtetet e Bashkuara për të marrë shtetësinë amerikane për fëmijën)
- ❌ Punë që rezulton në pagesë nga një punëdhënës ose biznes amerikan
- ❌ Studimi për një diplomë ose kredite akademike
- ❌ Performanca të paguara
Lista e plotë e vendeve për qytetarët e të cilëve pezullohet dhënia e vizave amerikane:
Afganistan, Shqipëri, Algjeri, Antigua dhe Barbuda, Armeni, Azerbaixhan, Bahamas, Bangladesh, Barbados, Bjellorusi, Belize, Butan, Bosnje-Hercegovinë, Brazil, Burma, Kamboxhia, Kamerun, Kepi i Gjelbërt, Kolumbi, Bregu i Fildishtë, Kuba, Republika Demokratike e Kongos, Dominika, Egjipti, Eritrea, Etiopia, Fixhi, Gambia, Gjeorgjia, Gana, Grenada, Guatemala, Guinea, Haiti, Iran, Irak, Xhamaika, Jordani, Kazakhstan, Kosova, Kuvajt, Kirgizistan, Laos, Liban, Liberi, Libi, Maqedonia e Veriut, Moldova, Mongolia, Mali i Zi, Marok, Nepal, Nikaragua, Nigeri, Pakistan, Republika e Kongos, Rusia, Ruanda, Saint Kitts dhe Nevis, Saint Lucia, Saint Vincent dhe Grenadines, Senegal, Sierra Leone, Somali, Sudani Jugor, Sudan, Siri, Tanzani, Tajlandë, Togo, Tunizi, Uganda, Uruguai, Uzbekistan dhe Jemen.
“`