Lideri suprem i Iranit, Khamenei pranon: Mijëra të vdekur gjatë protestave të fundit
Udhëheqësi suprem i Iranit, Ajatollah Ali Khamenei, ka pranuar publikisht për herë të parë se mijëra njerëz humbën jetën gjatë protestave të fundit, duke i përshkruar disa nga këto vdekje si “çnjerëzore dhe të egra”.
Sipas Agjencisë së Lajmeve të Aktivistëve të të Drejtave të Njeriut (HRANA), me seli në SHBA, reagimi i dhunshëm i qeverisë iraniane ndaj protestave, të cilat filluan më 28 dhjetor për çështje ekonomike, ka rezultuar me 3,090 viktima.
Ndërprerja e internetit ka vështirësuar jashtëzakonisht marrjen e informacioneve të qarta rreth ngjarjeve.
Në një fjalim të mbajtur të shtunën, Ajatollah Ali Khamenei deklaroi se mijëra njerëz u vranë gjatë trazirave, duke fajësuar për këto humbje “rebelët”. Ai gjithashtu sugjeroi se Presidenti i SHBA-së, Donald Trump, është përgjegjës për trazirat e fundit.
Kohët e fundit, Presidenti i SHBA-së, Donald Trump, u bëri thirrje protestuesve antiqeveritarë iranianë të “vazhdojnë të protestojnë” dhe kërcënoi me ndërhyrje ushtarake në rast se forcat e sigurisë vrasin protestues.
Pas kësaj, protestat kanë evoluar duke u kthyer në thirrje për t’i dhënë fund sundimit të udhëheqësit suprem të Iranit.
Qeveria iraniane i ka karakterizuar demonstratat si “trazira” të mbështetura nga armiqtë e Iranit.