Reshje bore, probleme me energjinë dhe qarkullimin në disa qarqe të vendit
Shqipëria është mbuluar nga dëbora mëngjesin e sotëm, si në veri ashtu edhe në jug. Kjo situative ka sjellë vështirësi në qarkullimin rrugor në zonat më të prekura.
Në qarqet veriore të Kukësit dhe Dibrës, reshjet e dëborës kanë qenë të dendura gjatë orëve të mëngjesit. Termometri ka zbritur deri në -9 gradë Celsius në zonat më të thella malore, me trashësinë e dëborës që arrin deri në 10 cm. Në Malësinë e Krujës, më në qendër të Shqipërisë, trashësia e borës arrin deri në 15 cm, ndërsa në juglindje, Dardha përbën pikën me praninë më të madhe të dëborës, deri në 50 centimetra.
Qarkullimi rrugor ka qenë kryesisht i qetë, por drejtuesit e mjeteve këshillohen të bëjnë kujdes dhe të mos anashkalojnë përdorimin e zinxhirëve aty ku kërkohet.
Në orët e mesditës, në qarkun e Korçës, Qafa e Thanës u bë sërish e aksesueshme pas një bllokimi disa orësh. Probleme paraqesin akset Maliq–Kufi Gramsh, Ersekë–Leskovik–Tre Urat dhe Boboshticë-Dardhë. Në skajin tjetër të vendit, vështirësi paraqesin rrugët Kukës–Peshkopi, Kukës–Qafë Mali, Krumë–Bajram Curri, si dhe aksi Kukës–Shishtavec, ku drejtuesit e mjeteve duhet të tregojnë kujdes të shtuar gjatë lëvizjes. Në Dibër, në aksin Pishat e Bulqizës deri tek tuneli në Qafën e Buallit, gjatë Rrugës së Arbrit, ka vështirësi për shkak të erërave.
Reshjet e dëborës kanë ndikuar në ndërprerjen e furnizimit me energji elektrike në disa zona, si fshatrat Gëdhesht, Shtrezë, dhe njësitë administrative Topojan në Kukës dhe Bujan në Tropojë. Mungesë energjie raportohet gjithashtu në Trebinjë, Bishnicë, Rehovë, Mazrek, Mesmal, Pepellash, Çardhak, Gërmenj dhe pjesërisht në Ersekë.