Trump për Groenlandën dhe Këshillin e Paqes: Italia dhe Polonia shprehin interes
Presidenti i SHBA-së, Donald Trump, gjatë kthimit nga Davosi, konfirmoi se Këshilli i Paqes i propozuar prej tij mbetet i hapur për vendet evropiane, duke shtuar se Italia dhe Polonia po shqyrtojnë mundësinë e anëtarësimit.
Duke iu përgjigjur pyetjeve nëse vende të tjera, si Mbretëria e Bashkuar apo Franca, do të dëshironin të bëheshin pjesë e këshillit, Trump shprehu bindjen se po, por vuri në dukje se në disa raste do të kërkohej miratimi legjislativ.
Ai përmendi se kryeministrja italiane, Giorgia Meloni, dhe presidenti polak, Karol Nawrotski, kanë shprehur gatishmërinë për të marrë pjesë, duke theksuar se fillimisht duhet të finalizohen procedurat e nevojshme institucionale.
Marrëveshja për Groenlandën dhe strategjia ushtarake
Lidhur me çështjen e Groenlandës, Trump argumentoi se ekziston një “frymë e mirë për të bërë diçka” dhe se Shtetet e Bashkuara do të kenë “aftësinë për të bërë pikërisht atë që duan” me mbështetjen e ushtrisë së tyre “të madhe”. Ai shtoi se marrëveshja do të ishte “shumë më bujare” dhe “shumë më e mirë” për SHBA-në, duke insistuar se është më e preferueshme të “mbulohet kjo copë akulli me sistemin e mbrojtjes nga raketat Golden Dome”.
Duke dhënë më shumë detaje rreth marrëveshjes së Groenlandës, Trump e përshkroi atë si “të pacaktuar” në kohëzgjatje, duke theksuar se Shtetet e Bashkuara do të ishin në gjendje të “bënin çfarë të donin” ushtarakisht në zonë. Ai sqaroi se marrëveshja është në proces negociimi dhe se të gjithë do të punojnë së bashku me NATO-n, e cila “do të marrë pjesë me ne”. Megjithatë, ai sqaroi se SHBA-ja nuk do të paguante për asgjë tjetër përveç sistemit të mbrojtjes nga raketat Golden Dome.
Kur u pyet nëse Danimarka pajtohet me këtë ide, Trump u përgjigj pozitivisht, duke shtuar se do të jepte përditësime të mëtejshme pas dy javësh.
Lufta në Ukrainë dhe përpjekjet për paqe
Trump iu referua gjithashtu luftës në Ukrainë, duke theksuar se ka pasur “shumë biseda rreth Ukrainës” dhe se “do të ishte mirë të përfundonte kjo luftë”. Ai përmendi takimin e të dërguarve të SHBA-së, Witkoff dhe Kushner, me Vladimir Putinin në Moskë, duke lënë të kuptohet se rezultati do të shihet me kalimin e kohës.
Ai shtoi se kishte pasur një “takoim të mirë” me Volodymyr Zelensky në Davos, duke pranuar megjithatë se takimet e mëparshme të suksesshme nuk kishin sjellë rezultate.
Trump deklaroi se nëse arrihet një marrëveshje, edhe Evropa do të përfshihet në proces. Ai pretendoi se si Zelensky ashtu edhe Putin “duan të bëjnë një marrëveshje”, duke konfirmuar se presidenti ukrainas ia kishte ripërsëritur këtë gjatë takimit të tyre. Ata diskutuan gjithashtu situatën e vështirë të popullsisë ukrainase, me mungesë energjie dhe ngrohjeje në temperatura të ulëta, duke e cilësuar mbijetesën e tyre si “vërtet mbresëlënëse”.
Duke iu referuar takimit trepalësh të planifikuar në Emiratet e Bashkuara Arabe, Trump theksoi rëndësinë e takimeve, duke thënë: “Sa herë që takohemi, është mirë. Nëse nuk takohemi, nuk do të ndodhë asgjë.”