Droga e fshehur në vezë Kinder: Shqiptar në Itali kapet me 2.5 kg kokainë
Një 35-vjeçar shqiptar është arrestuar në Itali për trafik droge, si i dyshuar pjesë e një rrjeti të organizuar për transportin dhe shpërndarjen e sasive të mëdha kokaine. Operacioni u zhvillua në Brescia, pak pasi i riu kishte furnizuar një klient në rrugë. Gjatë kontrollit fizik dhe në banesë, u sekuestruan rreth 2.5 kg kokainë e cilësisë së lartë, me një vlerë tregu prej mbi 300 mijë euro nëse do të shitej me pakicë.
Hetimet zbuluan se i arrestuari kishte shpikur një metodë të pazakontë për të shitur doza droge, duke i fshehur brenda kapsulave plastike të vezëve Kinder Surprise, konkretisht brenda pjesës së verdhë me kapakë.
35-vjeçari u akuzua për posedim të lëndëve narkotike me qëllim trafikimi. Ai u arrestua të mërkurën në mëngjes me urdhër të Prokurorisë, nën drejtimin e prokurorit Rosario Lioniello. I arrestuari u dërgua në burgun e Montacuto-s në pritje të një seance dëgjimore për vlerësimin e masës së sigurisë, e cila do të zhvillohet para gjyqtarit hetues. Ai do të përfaqësohet nga avokatja e tij, Antonella Devoli.
Oficerët e Policisë, të udhëhequr nga Zëvendëskomisioneri Carlo Pinto, ndiqnin një operacion kundër trafikut të drogës në qytet. Nga burime konfidenciale, ata mësuan se 35-vjeçari kishte krijuar një biznes të suksesshëm me kokainë, i cili gjeneronte fitime të konsiderueshme. Pavarësisht se ishte i papunë dhe me një precedent të vogël penal për vepra jo-droge, i riu udhëtonte me makinën e tij për të shpërndarë doza droge.
Pasi u arrestua një nga blerësit në flagrancë, u identifikua edhe furnizuesi shqiptar, i cili u kap në një pikë karburanti aty pranë. Gjatë kontrollit, iu gjetën edhe 6 gramë kokainë shtesë, të ndara në 15 doza, gjithashtu të fshehura brenda një mbështjellësi të verdhë Kinder Surprise.
Oficerët thelluan hetimet duke kontrolluar banesën e tij, ku jetonte i vetëm. Aty u zbulua se banesa ishte kthyer në një qendër droge. Në një tavolinë u gjetën një peshore precize, një pako e madhe ngjyrë kafe dhe tre të tjera më të vogla të mbushura me kokainë, materiale paketimi, dy prerëse kutish, katër telefona celularë si dhe një çantë me para. Të gjitha këto u sekuestruan.
Në total, në banesë u gjetën rreth 75 doza kokainë, me peshë rreth 40 gramë, të vulosura me nxehtësi dhe të paketuara në mënyrën e ngjashme me ato të gjetura tek 35-vjeçari. Gjithashtu u gjetën edhe 6 pako të tjera me mbi 2 kilogramë kokainë, të fshehura me kujdes. Në shtëpi ndodhej edhe një peshore dixhitale e madhe, e cila dyshohet të jetë përdorur për peshimin e sasive më të mëdha droge. U sekuestruan gjithashtu 3,000 euro, të cilat besohet se janë të ardhura nga aktivitetet e paligjshme të trafikimit të drogës.