SHBA-të Lehtësojnë Sanksionet ndaj Venezuelës Për Shitjet e Naftës
Administrata e Presidentit Donald Trump ka hequr disa sanksione mbi industrinë e naftës së Venezuelës, duke bërë më të lehtë për kompanitë amerikane shitjen e naftës bruto të këtij vendi. Zyra e Kontrollit të Aseteve të Huaja (OFAC) e Departamentit të Thesarit ka lëshuar një autorizim që lejon kompanitë amerikane të blejnë, shesin, transportojnë, ruajnë dhe rafinojnë naftën bruto të Venezuelës. Megjithatë, sanksionet ekzistuese mbi prodhimin e naftës mbeten në fuqi.
Një zyrtar i Shtëpisë së Bardhë deklaroi se kjo masë “do të ndihmonte në rrjedhën ekzistuese të produktit” nga Venezuela dhe se priten njoftime të mëtejshme rreth lehtësimit të sanksioneve.
Presidenti Trump ka theksuar se Shtetet e Bashkuara synojnë të kontrollojnë shitjet dhe të ardhurat nga nafta e Venezuelës, pas ngjarjeve të 3 janarit në kryeqytetin Caracas. Ai gjithashtu ka shprehur dëshirën që kompanitë amerikane të naftës të investojnë 100 miliardë dollarë për të rikthyer prodhimin e Venezuelës në nivelet historike, pas viteve të mungesës së investimeve dhe keqmenaxhimit.
Marrëveshja fillestare mes SHBA-së dhe Venezuelës ka përfshirë shitjen e 50 milionë fuçive naftë bruto venezueliane, me shtëpitë tregtare evropiane Vitol dhe Trafigura që kanë negociuar furnizimin.
Autorizimi i ri i Thesarit, i njohur si licencë e përgjithshme, hap tregtinë e naftës së Venezuelës për kompani të tjera, por vetëm ato me bazë në Shtetet e Bashkuara. Ai përfshin transaksione me qeverinë e Venezuelës dhe kompaninë shtetërore të naftës PDVSA, lidhur me nxjerrjen, eksportimin, shitjen, ruajtjen, blerjen dhe transportimin e naftës me origjinë venezueliane. Kjo licencë përjashton në mënyrë specifike firmat dhe individët nga vende si Kina, Irani, Koreja e Veriut, Kuba dhe Rusia.
Në vitin 2019, gjatë administratës së Trump, Departamenti i Thesarit i kishte vendosur gjithë industrinë e energjisë të Venezuelës nën sanksione, pas rizgjedhjes së Maduros, të cilën Uashingtoni nuk e njohu. Licenca e re nuk lejon pagesa me kushte jo-komercialisht të arsyeshme, siç janë shkëmbimet e borxhit, pagesat në ar, apo ato të denominuara në monedhë dixhitale.
Kompanitë si Chevron, Repsol, ENI, Reliance Industries dhe disa ofrues të shërbimeve të naftës në SHBA kishin kërkuar licenca kohët e fundit për të zgjeruar prodhimin ose eksportet nga Venezuela. Megjithatë, çdo zgjerim i prodhimit në vend do të kërkonte autorizime shtesë nga SHBA.
Ekspertët vlerësojnë se ky autorizim është i gjerë në aspektin e operacioneve të lejuara, por i ngushtë për nga shtrirja gjeografike e kompanive të përfshira. Ai ofron qartësi për kompanitë amerikane, duke ruajtur një standard të mëparshëm të shqyrtimit rast pas rasti për subjektet jo-amerikane, çka mund të shihet si një lehtësim nga politikat e mëparshme.
Numri i madh i kërkesave individuale drejtuar qeverisë amerikane kishte vonuar planet për zgjerimin e eksporteve dhe përshpejtimin e investimeve në Venezuelë.
Ndërkohë, miratimi i reformës së ligjit kryesor të naftës në Venezuelë nga ligjvënësit, pritet t’u japë më shumë autonomi prodhuesve privatë, duke formalizuar një model të ndarjes së prodhimit të naftës.
Ekspertët shprehin shqetësim se përjashtimi i subjekteve ruse dhe kineze nga ky autorizim mund të vësjhtirësojë operimin ose tregtimin e naftës nga këto sipërmarrje, të cilat aktualisht kontribuojnë rreth 22% të prodhimit total të naftës.