Bill dhe Hillary Clinton pranojnë të dëshmojnë në Kongres për skandalin Epstein, pasi më parë refuzuan për muaj të tërë.
Ish-presidenti amerikan Bill Clinton dhe ish-Sekretarja e Shtetit Hillary Clinton kanë rënë dakord të paraqiten para Kongresit të Shteteve të Bashkuara për të dëshmuar në kuadër të hetimit lidhur me skandalin Jeffrey Epstein, sipas raportimeve të BBC.
Ky vendim vjen vetëm pak ditë para një votimi të pritshëm në Dhomën e Përfaqësuesve. Votimi do të përcaktonte nëse çifti Clinton do të mbahej penalisht përgjegjës për shpërfillje të Kongresit, pasi për disa muaj kishin refuzuar të paraqiteshin para Komitetit të Mbikëqyrjes së Dhomës.
Bill Clinton ka pranuar më parë se ka pasur lidhje me Epstein, i cili vdiq në burg në vitin 2019. Megjithatë, ai ka mohuar çdo dijeni për veprimtarinë kriminale të Epstein dhe ka deklaruar se i kishte ndërprerë kontaktet me të rreth dy dekada më parë.
Ende nuk është bërë e ditur data e saktë e seancave dëgjimore. Kjo do të shënojë herën e parë që një ish-president amerikan dëshmon para një komiteti të Kongresit që nga viti 1983, kur ish-presidenti Gerald Ford u paraqit për të dëshmuar.
Komiteti i Mbikëqyrjes, i cili drejtohet nga republikanët, miratoi muajin e kaluar një masë për të shpallur Clintonët në shpërfillje të Kongresit. Kjo masë mori mbështetje edhe nga disa ligjvënës demokratë.
Të hënën në mbrëmje, zëvendësshefi i stafit të Bill Clinton, Angel Urena, konfirmoi përmes një postimi në rrjetin social X se çifti do të paraqitet përpara komitetit hetimor.