“Leonardo” shkakton përmbytje në Spanjë dhe Portugali: Një person humb jetën, një vajzë e vogël rezulton e zhdukur
Një burrë humbi jetën në Portugali pasi automjeti me të cilin udhëtonte u përmbyt si pasojë e reshjeve intensive që kanë goditur vendin. Ndërkohë, në Spanjë, një vajzë e vogël rezulton e zhdukur pasi u tërhoq nga rrjedha e lumit.
Stuhia “Leonardo” ka goditur gadishullin Iberik me shira të rrëmbyeshëm dhe erëra të forta prej dy ditësh. Shefi i zjarrfikësve të Malagës, Manuel Marmolejo, deklaroi për televizionin spanjoll: “E kaluam gjithë pasditen dhe natën e djeshme duke kërkuar për vajzën e cila ra në lumë.”
Në lidhje me pasojat ekonomike, Ministri i Ekonomisë i Portugalisë, Manuel Castro Almeida, tha se kostot e rindërtimit në Portugali, vetëm pas stuhisë “Kristin” të javës së kaluar, mund të arrijnë në mbi 4 miliardë euro.
Shërbimet e emergjencës së Andaluzisë morën pjesë në shumë incidente deri në mesnatën e së mërkurës, sipas zyrtarëve spanjollë. Antonio Sanz, kreu i departamentit të brendshëm të qeverisë rajonale, raportoi se katërmbëdhjetë lumenj dhe 10 diga ishin në rrezik “ekstrem” përmbytjeje.
Mbrojtja Civile Kombëtare e Portugalisë njoftoi se kishte regjistruar të paktën 70 incidente që nga fillimi i së enjtes.