44 vjet burgim: Fitueses iraniane të Nobel-it për Paqe i shtohet dënimi; nisi grevë urie
Fituesja e Çmimit Nobel për Paqen, Narges Mohammadi, është dënuar nga një gjykatë iraniane edhe me shtatë vjet e gjysmë burgim, siç bëri të ditur avokati i saj, Mostafa Nili.
Sipas avokatit, aktivistja 53-vjeçare e të drejtave të njeriut u dënua me gjashtë vjet burg për akuzën e “grumbullimit dhe bashkëpunimit” dhe një vit e gjysmë për “aktivitete propagandistike”. Ky vendim u dha nga një gjykatë në qytetin verilindor të Mashhadit.
Mohammadi u arrestua në dhjetor gjatë një ceremonie përkujtimore, ku autoritetet iraniane e akuzuan për bërjen e “vërejtjeve provokuese”. Familjarët kanë deklaruar se ajo u dërgua në spital pasi u rrah gjatë arrestimit.
Avokati Nili shtoi se Mohamadi i është ndaluar largimi nga vendi për dy vjet dhe është dënuar me dy vjet mërgim në rajonin lindor Khusf.
Fondacioni Narges e cilësoi seancën gjyqësore si një “mashtrim” dhe njoftoi se Mohammadi ka nisur grevë urie që prej datës 2 shkurt. Për shkak të gjendjes së rënduar shëndetësore, ajo është shtruar përkohësisht në spital.
Bashkëshorti i saj, Taghi Rahmani, e përshkroi dënimin si “mizor dhe jashtëzakonisht të padrejtë”. Ai theksoi se Mohammadi refuzoi të mbrohej në gjykatë, pasi sipas saj procesi nuk kishte legjitimitet. Rahmani u bëri thirrje organizatave ndërkombëtare të të drejtave të njeriut të reagojnë kundër këtij vendimi.
Mohammadi, e cila fitoi Çmimin Nobel për Paqen në vitin 2023 për aktivizmin e saj kundër shtypjes së grave në Iran, ka kaluar tashmë më shumë se 10 vjet në burg. Sipas Fondacionit Narges, dënimi i fundit e çon totalin e viteve të burgimit të urdhëruara ndaj saj në 44 vjet.