Britania i kërkon Izraelit të mos e zgjerojë kontrollin mbi Bregun Perëndimor
Britania i ka bërë thirrje Izraelit të tërheqë vendimin për zgjerimin e kontrollit mbi Bregun Perëndimor. Londra iu bashkua Arabisë Saudite dhe Emirateve të Bashkuara Arabe në denoncimin e këtij vendimi.
“Mbretëria e Bashkuar dënon fuqimisht vendimin e djeshëm të Këshillit të Sigurisë Izraelite për të zgjeruar kontrollin izraelit mbi Bregun Perëndimor”, thuhet në një deklaratë nga Downing Street.
Kritikët e vendimit theksojnë se lëvizja e Izraelit për të lehtësuar zgjerimin e vendbanimeve dhe për të shtuar fuqitë e tij në Bregun Perëndimor përbën aneksim të territorit të pushtuar. Sipas tyre, ndryshimet e rëndësishme të propozuara në kontrollin e tokës dhe fuqitë administrative në Bregun Perëndimor do të minonin përpjekjet për promovimin e paqes dhe stabilitetit.
“Çdo përpjekje e njëanshme për të ndryshuar përbërjen gjeografike ose demografike të Palestinës është plotësisht e papranueshme dhe do të ishte e papajtueshme me të drejtën ndërkombëtare. Ne i bëjmë thirrje Izraelit që të tërheqë menjëherë këto vendime”, shtoi qeveria britanike.
Më herët, Sekretari i Përgjithshëm i OKB-së, Antonio Guterres, shprehu “shqetësim të thellë” në lidhje me masat e shpallura së fundmi nga Izraeli për të forcuar kontrollin e tij mbi Bregun Perëndimor, sipas zëdhënësit të tij. Shefi i OKB-së “paralajmëron se situata aktuale, përfshirë këtë vendim, minon perspektivën e një zgjidhjeje me dy shtete”, tha Stephane Dujarric.
Masat e reja izraelite për Bregun Perëndimor, të shpallura gjatë fundjavës, përfshijnë lehtësimin e shitjes së tokës për kolonët dhe kontrollin e vendeve të shenjta. Këto masa, të cilat janë denoncuar ndërkombëtarisht, rrezikojnë të përshpejtojnë aneksimin e territorit të pushtuar, duke e bërë më të lehtë për kolonët të blejnë tokë dhe duke shtyrë popullsinë palestineze të përqendrohet në enklava urbane, sipas analistëve.
Teksti i plotë i masave nuk është bërë publik, por disa prej tyre janë njoftuar përmes deklaratave. Data e saktë e zbatimit të tyre është e panjohur, por ato nuk kërkojnë miratim nga ndonjë organ tjetër.
Rreziku i enklavave palestineze
Masat gjithashtu do të forcojnë kontrollin e Izraelit mbi pjesë të Bregut Perëndimor, ku Autoriteti Palestinez, me seli në Ramallah, ushtron pushtet. Sipas Marrëveshjeve të Oslos, Bregu Perëndimor është i ndarë në Zona A, B dhe C – të cilat janë nën kontrollin palestinez, të përbashkët dhe izraelit, respektivisht.
Sipas një deklarate qeveritare, masat e reja do të zgjerojnë autoritetin izraelit mbi këto zona për të luftuar “shkeljet që lidhen me ujin, dëmtimin e vendeve arkeologjike dhe ndikimet mjedisore që ndotin të gjithë zonën”.
Për Fathi Nimer, një specialist në qendrën kërkimore palestineze Al-Shakaba, kjo deklaratë “tmerrësisht e paqartë” rrezikon të përdoret si bazë për zhvendosjen e palestinezëve.
“Ajo që ata duan është t’i shtyjnë palestinezët në copa të vogla toke, përgjithësisht në qytetet e mëdha, në enklava”, shton politologu Ali Jarbawi.
“Izraeli po promovon aneksimin, është diçka që e kemi vëzhguar për tre vjet, por ajo që është gjithashtu e rëndësishme në këtë rast është se Izraeli ka vendosur gjithashtu të dobësojë Autoritetin Palestinez”, nënvizon Jonathan Mizrashi nga lëvizja izraelite kundër vendbanimeve Paqe Tani.