Rikthehen protestat masive në Iran, studentët sfidojnë sërish regjimin pas shtypjeve dhe mijëra viktimave në janar.
Studentët në disa universitete në Iran kanë organizuar protesta antiqeveritare. Këto tubime të para në këtë përmasë vijnë pas shtypjeve nga autoritetet. BBC ka verifikuar pamjet e demonstruesve që marshonin në kampusin e Universitetit të Teknologjisë Sharif në kryeqytetin Teheran. Gjatë tubimit pati edhe përleshje mes demonstruesve dhe mbështetësve të qeverisë.
Protesta u mbajtën gjithashtu në një universitet tjetër të Teheranit dhe një tubim u raportua në verilindje. Studentët po nderonin mijëra persona të vrarë gjatë protestave masive në janar.
Në këtë kontekst, Shtetet e Bashkuara të Amerikës kanë qenë duke forcuar praninë e tyre ushtarake pranë Iranit. Presidenti Donald Trump ka deklaruar se po shqyrton një sulm të kufizuar ushtarak. SHBA-të dhe aleatët e tyre evropianë dyshojnë se Irani po lëviz drejt zhvillimit të një arme bërthamore, pretendim që Irani e ka mohuar gjithmonë.