“`html
Bie sërish shteti online, shumë faqe agjencish (.gov.al) nuk hapen, probleme me energjinë
Shumë faqe qeveritare, të cilat përdorin domenit .gov.al, sot nuk kanë qenë të aksesueshme. Ka qenë e pamundur qasja në institucione si Autoriteti i Shërbimit Rrugor, Agjencia e Zhvillimit të Territorit, Agjencia Kombëtare e Burimeve Natyrore, Agjencia e Administrimit të Pasurive të Sekuestruara dhe Konfiskuara, Agjencia Kombëtare e Bregdetit, Agjencia e Trajtimit të Pronave, dhe shumë të tjera.
Gjithashtu, është raportuar se rënia e sistemit ka ndikuar edhe në mosfunksionimin e internetit në Drejtorinë e Përgjithshme të Doganave. Gjatë ditës, në këtë institucion ka pasur ndërprerje të vazhdueshme të energjisë elektrike.
Sipas burimeve nga Agjencia Kombëtare e Shërbimit të Informacionit (AKSHI), e cila menaxhon faqet me domain .gov.al, e-albania, qendrën e të dhënave qeveritare dhe sistemin e informacionit të shtetit, probleme me furnizimin me energji elektrike kanë pasur disa institucione, ndërkohë që faqet kanë qenë funksionale. Platforma e-Albania ka qenë e aksesueshme.
Ky incident vjen në një kohë kur prej muajsh, si bizneset ashtu edhe individët po hasin probleme me aksesin në faqet qeveritare. Kohët e fundit, sistemi “self-care”, i cili përdoret gjerësisht nga bizneset, nuk ka qenë funksional për javë të tëra, duke penguar aktivitetin e tyre.
Një javë më parë, Sistemi Informatik i Menaxhimit Financiar të Shqipërisë (AFMIS) nuk ka funksionuar, duke detyruar Agjencinë e Prokurimit Publik t’i njoftojë institucionet e tjera publike të pajisen me numër transaksioni për procedurat e prokurimit.
Procedurat e mirëmbajtjes kanë ngecur për shkak të problemeve me procedurat e prokurimit që nga korriku i vitit të kaluar. Shumë tendera të mirëmbajtjes janë anuluar, siç është rasti i tenderit për internetin, i cili u zvarrit për një kohë të gjatë për shkak të ankimimeve, dhe për të cilin Komisioni i Prokurimit Publik dha miratimin në javën e parë të shkurtit. Edhe tenderi për mirëmbajtjen e fiskalizimit është pezulluar disa herë, duke shkaktuar probleme me sistemin “self-care”.
“`