“`html
Shpopullimi/ Në 2024 braktisën Shqipërinë 44 mijë qytetarë
Rreth 44 mijë shqiptarë kanë emigruar drejt vendeve të Bashkimit Europian në vitin 2024. Këto të dhëna, të bëra publike nga Eurostat në statistikat e imigracionit në BE, tregojnë një rënie krahasuar me periudhën 2022-2023, kur u shënua ritmi më i lartë i emigracionit të dekadës së fundit, me rreth 50 mijë persona në vit. Megjithatë, ritmet aktualë mbeten më të lartë se para pandemisë, me përjashtim të vitit 2015, i cili shënoi një rekord kërkesash për azil dhe fillimin e një cikli të ri emigracioni.
Duhet theksuar se këto shifra nuk përfshijnë Greqinë, e cila vazhdon të jetë një destinacion kryesor për emigrantët shqiptarë.
Që nga viti 2010, vendet e Bashkimit Europian kanë regjistruar 460 mijë emigrantë të rinj nga Shqipëria. Ky fenomen pasqyron një cikël të ri masiv emigracioni, veçanërisht në raport me popullsinë e vendit, e cila ka zbritur në 2.36 milionë banorë, nga 2.8 milionë që ishte në Censusin e vitit 2011.
Vetëm pas pandemisë, gjatë periudhës 2021-2024, të paktën 180 mijë persona kanë lënë vendin, pa përfshirë këtu të dhënat nga Greqia dhe Mbretëria e Bashkuar. Për këtë të fundit, një valë e konsiderueshme largimesh kulmoi në vitin 2022.
Sipas Eurostat, destinacioni kryesor në vitin 2024 ishte Italia, me gati 28 mijë emigrantë, krahasuar me 29-30 mijë në dy vitet e mëparshme. Në vend të dytë renditet Gjermania, e cila kohët e fundit është bërë tërheqëse për profesionistë, kryesisht mjekë, infermierë dhe specialistë të teknologjisë së informacionit, me rreth 12 mijë emigrantë të regjistruar në 2024.
Europa
Në vitin 2024, Eurostat raporton se rreth 4.2 milionë emigrantë mbërritën në BE nga vende jashtë saj, ndërsa 1.5 milionë persona u zhvendosën nga një shtet anëtar në një tjetër. Këto shifra nuk përfshijnë refugjatët nga Ukraina që kanë mbrojtje të përkohshme në disa vende. Gjithashtu, rreth 3.2 milionë persona emigruan drejt vendeve jashtë BE-së ose brenda saj. Prej tyre, rreth 1.6 milionë u raportua se u larguan nga një shtet i BE-së për të emigruar jashtë saj.
Për krahasim, në vitin 2023, rreth 4.4 milionë emigrantë mbërritën në BE nga vende jashtë saj dhe 1.5 milionë persona u zhvendosën nga një shtet anëtar në një tjetër. Po atë vit, rreth 1.5 milionë persona emigruan nga BE drejt vendeve jashtë saj.
Në pothuajse të gjitha vendet e BE-së, numri i emigrantëve që mbërritën nga vende jashtë BE-së në vitin 2024 ishte më i lartë se ai i emigrantëve nga vende të tjera të BE-së. Përjashtim bëjnë Luksemburgu (ku 85.5% e emigrantëve vinin nga vende të tjera të BE-së) dhe Rumania (56.0%). Përqindjet më të larta të emigrantëve nga vende jashtë BE-së u regjistruan në Çeki (87.0%), Itali (86.2%) dhe Spanjë (84.5%).
“`