Trump për çmimet e karburantit: “Nëse rriten, le të rriten”
Presidenti i SHBA-së, Donald Trump, deklaroi të mërkurën se nuk shqetësohet nga rritja e çmimeve të karburantit në SHBA, duke theksuar në një intervistë ekskluzive për Reuters se prioriteti i tij kryesor është operacioni ushtarak kundër Iranit dhe hakmarrja e këtij të fundit në vendet e Lindjes së Mesme.
“Nuk jam aspak i shqetësuar për këtë,” u shpreh ai kur u pyet për rritjen e çmimeve të benzinës. “Ato do të ulen shumë shpejt sapo të mbarojë kjo. Dhe nëse rriten, le të rriten. Por kjo është shumë më e rëndësishme sesa një rritje e vogël e çmimit të benzinës.”
Presidenti amerikan kishte përmendur së fundmi një afat kohor prej 4-5 javësh për operacionin ushtarak kundër Iranit. Megjithatë, analistët politikë dhe ushtarakë kundërshtojnë këtë vlerësim, duke theksuar se qeveria amerikane nuk ka sqaruar ende qëllimin përfundimtar të operacionit, në një kohë kur lufta po përhapet në Lindjen e Mesme.
Në intervistën për Reuters, Trump sqaroi se nuk po shqyrton mundësinë e lirimit të një pjese të rezervave strategjike të naftës të SHBA-së. Ai shprehu siguri se Ngushtica e Hormuzit – rruga strategjike detare për transportimin e naftës, pranë brigjeve të Iranit – do të mbetej e hapur, duke theksuar se flota iraniane është “në fund të detit”.
Çmimet e naftës në tregjet ndërkombëtare janë rritur me 16% që nga fillimi i luftës të shtunën. Në Shtetet e Bashkuara, çmimi mesatar i benzinës është rritur me 27 cent nga java e kaluar, duke arritur në 3.25 dollarë për galon, sipas Shoqatës Amerikane të Automobilave. Kjo mesatare është 15 cent më e lartë se vitin e kaluar. Nga ana e tij, Trump pohon se çmimet “nuk janë rritur shumë”.
Shtëpia e Bardhë po merr si të mirëqenë se sulmet ndaj Iranit dhe problemet e pasojë me stacionet e benzinës do të përfundojnë së shpejti. Megjithatë, analistët politikë paralajmërojnë se nëse rritja e çmimeve të karburantit vazhdon për një kohë të gjatë, kjo mund të dëmtojë republikanët në zgjedhjet e mesit të mandatit të nëntorit, ku është në lojë kontrolli i Kongresit të SHBA-së. Votuesit janë tashmë të pakënaqur me koston e lartë të jetesës dhe politikat ekonomike të Trump.