Tornado vdekjeprurëse godasin Michiganin, raportohet për viktima dhe dëme materiale
Të paktën katër persona kanë humbur jetën dhe më shumë se dhjetë të tjerë janë plagosur pasi disa tornado kanë goditur shtetin verior të Michiganit, në Shtetet e Bashkuara. Informacionet janë konfirmuar nga autoritetet dhe mediat lokale amerikane.
Një person ka vdekur në Qarkun Cass, në skajin jugperëndimor të shtetit, ku dhe disa persona të tjerë kanë pësuar lëndime, sipas deklaratave të sherifit lokal.
Televizioni lokal WTVB, duke cituar të njëjtin burim, raporton se një tjetër tornado që ka goditur zonën pranë Union City, në jug të Michiganit, ka shkaktuar tre viktima dhe ka plagosur 12 persona.
Stuhitë e forta kanë shkaktuar dëme të konsiderueshme në disa zona, duke shkatërruar banesa dhe duke rrëzuar linja të furnizimit me energji elektrike.