Kryeministri Rama: Ruajmë çmimin e naftës, në treg distributor shtetëror për blerjet me shumicë
Kryeministri Edi Rama zhvilloi sot një bashkëbisedim me furnizuesit e naftës për të diskutuar masat kundër krizës së rritjes së çmimeve të naftës në tregjet e huaja, si pasojë e fillimit të luftës në Lindjen e Mesme.
Kreu i qeverisë theksoi se, bazuar në përvojat e mëparshme, përfshirë krizën e shkaktuar nga agresioni rus në Ukrainë, qeveria ka qenë e nevojshme të luajë një rol aktiv në menaxhimin e tregut të karburanteve, duke monitoruar situatën.
Ndonëse çmimet në bursat ndërkombëtare janë rritur deri në 40%, në Shqipëri rritja ka qenë më e moderuar, deklaroi kryeministri. Ai shtoi se situata mbetet e pasigurt dhe askush nuk mund të parashikojë evolucionin e çmimeve globale.
Megjithatë, qeveria është e gatshme të ndërhyjë nëse do të jetë e nevojshme, duke filluar nga:
- Përdorimi i rezervave, nga 30 ditë deri në 100 ditë.
- Futja në treg e një kompanie shtetërore që do të funksionojë si distributor me shumicë për furnizimet e operatorëve privatë.
Kryeministri Rama theksoi rëndësinë e marrjes së rolit aktiv nga qeveria në trajtimin e çështjes së naftës, duke vlerësuar qasjen e përgjegjshme të furnizuesve deri më tani.
Ai shtoi se sfida mbetet e hapur dhe askush nuk mund të parashikojë se kur do të mbyllet konflikti dhe si do të ndikojë ky tek çmimet. “Ne do të bëjmë atë që na takon, duke nisur nga rezervat,” tha ai.
Rama informoi se rezervat fizike ekzistuese janë për 30 ditë, ndërsa kontratat përfshijnë 100 ditë, gjë që është pozitive. Ai gjithashtu përmendi konsultimin publik për ligjin për rezervën shtetërore, e cila do të shtrihet fizikisht për 100 ditë.
Nismën për futjen e një faktori shtetëror si distributor me shumicë do ta finalizojë qeveria, për të garantuar sasinë e nevojshme dhe për të lehtësuar marrëdhëniet me të tretët.
Në përfundim, kryeministri kërkoi nga furnizuesit të ruajnë ekuilibrin aktual. Ai theksoi se qëllimi i qeverisë nuk është t’u ngarkojë detyrë shtesë, por duke pasur parasysh peshën e krizës në Lindjen e Mesme, ajo nuk mund të mbahet tërësisht nga konsumatori. Kjo do të thotë marzhe fitimi më të ulëta për kompanitë, por kjo është më e preferueshme se sa ndërhyrja direkte e shtetit në treg.