Wall Street Journal: SHBA miraton shitjen e armëve dhe municioneve me vlerë 7 miliardë dollarë te Emiratet e Bashkuara Arabe
Administrata Trump ka miratuar një shitje shtesë prej 7 miliardë dollarësh armësh dhe municionesh për Emiratet e Bashkuara Arabe, pa pasur nevojë që Departamenti i Shtetit t’i njoftojë Kongresit, sipas ligjit amerikan që rregullon transaksione të tilla, raportoi të enjten Wall Street Journal. Këto blerje janë shtesë ndaj shitjeve prej 16.5 miliardë dollarësh të njoftuara më parë.
Shitja përfshin raketa PAC-3 për sistemet Patriot, me vlerë rreth 5.6 miliardë dollarë, dhe helikopterë CH-47 Chinook, me vlerë 1.32 miliardë dollarë. Sipas raportit, këto shitje nuk u bënë publike sepse ato përbëjnë zgjatje të marrëveshjeve të miratuara më parë.