Hungaria, “spiune” e Moskës në BE? Washington Post: Rusia në alarm për rënien e mbështetjes ndaj Orban! Ja plani që synonte ta ndihmonte në zgjedhje
Një muaj para zgjedhjeve në Hungari, një njësi e shërbimit të inteligjencës së jashtme të Rusisë raportohet se ngriti alarmin për rënien e mbështetjes publike për kryeministrin Viktor Orban. Afërsia e tij me Moskën i ka siguruar prej kohësh Kremlinit një pikëmbështetje strategjike brenda NATO-s dhe Bashkimit Evropian.
Sipas një raporti inteligjence ruse të parë nga Washington Post, agjentët propozuan masa drastike për të përmbysur rezultatin e votimit, përfshirë një sulm të rremë ndaj Orbanit. Kjo strategji, e quajtur ‘Ndryshuesi i Lojës’, synonte të “ndryshonte rrënjësisht të gjithë paradigmën e fushatës zgjedhore”.
Raporti sqaron se “Një incident i tillë do ta zhvendosë perceptimin e fushatës zgjedhore nga niveli racional i çështjeve socioekonomike në atë emocional, dhe temat qendrore do të bëhen siguria shtetërore, si dhe stabiliteti dhe mbrojtja e sistemit politik”.
Megjithëse plani nuk u materializua, lidhjet mes Moskës dhe Budapestit vijojnë të jenë të forta. Sipas burimeve të informuara të Washington Post, qeveria Orban i ka ofruar prej kohësh Moskës qasje në diskutimet më të ndjeshme brenda Bashkimit Evropian. Zyrtarë evropianë zbulojnë se Ministri i Jashtëm Péter Szijjártó telefonon rregullisht gjatë mbledhjeve të Këshillit Evropian, për t’i ofruar homologut të tij rus, Sergey Lavrov, “raporte të drejtpërdrejta mbi diskutimet dhe zgjidhjet e mundshme”.