Paga për drejtuesit shqiptarë të kamionit arrin deri në 2,500 euro për shkak të mungesës së punonjësve.
Bizneset në Shqipëri, veçanërisht në sektorin e transportit, po përballen me mungesë të fuqisë punëtore, duke i detyruar të rrisin pagat për të përmbushur nevojat.
Rreth dy vite më parë, sigurimi i shoferëve të kamionëve ishte një nga sfidat më të mëdha për kompanitë e transportit të mallrave. Për të mbushur boshllëkun, disa firma filluan të punësonin shtetas të huaj, kryesisht nga Egjipti, ndërsa drejtuesit shqiptarë të kamionëve emigronin drejt vendeve të Bashkimit Evropian, sidomos Gjermanisë, për paga mbi 2,000 euro.
Për të zgjidhur këtë problematikë, operatorët e transportit të mallrave me kamion janë detyruar të rrisin pagat për shoferët e tyre me 30% deri në 50% gjatë dy viteve të fundit.
Rodolf Xhillari nga kompania “Balkan Trans Albania” deklaroi se pagat për shoferët e kamionëve aktualisht variojnë nga 2,000 deri në 2,500 euro në muaj. Ai shtoi se rritja e pagave ishte e domosdoshme për të frenuar emigracionin e punonjësve drejt vendeve me paga më të larta. Gjithashtu, ai theksoi se skema për punonjës të huaj nuk po funksiononte siç duhet, pasi shumë prej tyre e përdornin Shqipërinë si vend tranzit për të kaluar në Europë.
Sipas të dhënave të “Economic Research Institute”, paga mesatare për shoferët e kamionëve në vende të tjera është si më poshtë:
- Gjermani: deri në 4,000 euro në muaj
- Itali: rreth 3,000 euro në muaj
- Greqi: rreth 2,100 euro në muaj
- Maqedoni e Veriut: nga 1,300 deri në 2,000 euro në muaj
Para dy vitesh, paga minimale për drejtuesit e kamionëve në Shqipëri varionte nga 500 deri në 600 euro, ndërsa paga maksimale ishte nga 1,000-1,500 deri në 2,000 euro. Rrogat për drejtuesit e kamionëve në Europë aktualisht fillojnë nga 2,000 euro.
Rodolf Xhillari më parë kishte bërë të ditur se mungesa e fuqisë punëtore po bënte që 25% deri në 30% e mjeteve të transportit të qëndronin pa lëvizur për shkak të mungesës së drejtuesve të kamionëve. Rritja e vazhdueshme e pagave ka sjellë gjithashtu rritje të kostos për bizneset.
Vështirësi në gjetjen e shoferëve të kamionëve dhe punonjësve mbështetës janë hasur edhe nga kompanitë që merren me importin dhe shpërndarjen e mallrave ushqimore. Problematika shtrihet edhe në sektorin e transportit të pasagjerëve.
Kryetari i Shoqatës Kombëtare të Transportit Qytetas, Kostandin Foni, ka deklaruar se operatorët e transportit urban po përballen me vështirësi për të gjetur shoferë autobusi për linjat publike në Tiranë. Sipas tij, zgjidhja e vetme që është ndërmarrë deri tani është rritja e pagës. Paga mesatare e një shoferi autobusi ka arritur 90,000 lekë në muaj, ndërsa ajo e një faturinos është 75,000 lekë në muaj.