“`html
Berisha: SPAK, me urdhër të Ramës, mbylli rastin e gjyqtares Irena Gjoka
Kreu i Partisë Demokratike, Sali Berisha, ka denoncuar atë që e cilëson si një ndër rastet më të rënda të ndërhyrjes politike në sistemin e drejtësisë.
Në një deklaratë për mediat, Berisha tha se vendimet e marra nga strukturat e drejtësisë në lidhje me rastin e gjyqtares Irena Gjoka përbëjnë prova të qarta të ndikimit politik dhe të mbylljes së çështjeve sensitive me urdhër nga lart.
Ai theksoi se institucionet që duhet të garantojnë zbatimin e ligjit po veprojnë në mënyrë selektive, duke mbrojtur individë të caktuar dhe duke shmangur përgjegjësinë ligjore.
Berisha ngriti shqetësimin se ky rast dëshmon një standard të dyfishtë në drejtësi dhe mungesë transparence, duke e konsideruar situatën si një problem serioz për funksionimin e shtetit të së drejtës dhe besimin e qytetarëve tek institucionet.
“Së fundmi, është dëshmia e turpshme e re e kontrollit total të Edi Ramës mbi sistemin e drejtësisë. Siç janë informuar shqiptarët, në kundërshtim flagrant me ligjin, me Kushtetutën, por edhe me një seri precedentësh të Gjykatës së Lartë, SPAK-u, me urdhër të Edi Ramës, vendosi të mbyllë rastin e Irena Gjokës,” tha Berisha.
Ai shtoi: “Nuk ka shembull më të turpshëm. Nuk ka dëshmi më flagrante të kontrollit të sistemit të drejtësisë nga Edi Rama sesa rasti i Irenës me 5 mbiemra. Prokuroria e Përgjithshme qëndroi dy vite gjoja për të vërtetuar vendimin penal të sjellë nga shteti grek me vulë apostile. KLGJ me urdhër të Ramës refuzoi të konsideronte vendimin me vulë apostile dhe ka nënshkruar, në mbrojtje të Irenës, sipas direktivës së Ramës, katër përgjigje, duke thënë se do të shprehej vetëm pasi të merrte konfirmimin me shkrim nga Prokuroria e Përgjithshme. Por, pasi Prokurori i Përgjithshëm konfirmoi vendimin penal të Irena Gjokës, KLGJ ndryshoi qëndrim dhe ia kaloi ILD-së.
Jo vetëm kaq, por raporti i Prokurorisë së Përgjithshme shpallet top-sekret. Keni parë ju njerëz si këta? Skllevër të Edi Ramës. Çfarë mund të ketë për sekret, veçse frika nga Edi Rama dhe vetëposhtërimi që nuk duan t’i bëhet publik? Prokurori i Përgjithshëm nuk ka guxuar të shprehet as për dy dëbimet nga Greqia, as për prokurën që Irena ka lëshuar për të kundërshtuar dëbimet, as për falsifikimet sikur ishte minoritare, as për falsifikimin e formularit të dekriminalizimit, as për falsifikimin e formularit të vetingut, as për informimin e KLGJ siç e kërkon ligji. Prandaj fshehin raportin, nuk e jep raportin Olsi Rama, Olsi Çela dhe nuk ia japin palëve, ndonëse atyre me ligj u takon.
Në SPAK janë bërë disa kallëzime penale në lidhje me veprat penale të Irena Gjokës: mosdeklarimin e dënimit penal në Greqi nga Irena Gjoka në formularët e dekriminalizimit, përveç deklarimit që duhej të bënte për vete në KLGJ. Mosdeklarimin e dëbimeve të saj në formularët e dekriminalizimit. Shpërdorim detyre, sepse asnjëherë nuk mori veprime për deklarimin e këtyre rrethanave në KLGJ. Pra, të gjitha këto u mbyllën me urdhër të Edi Ramës.
Altin Troplini, po me urdhër të Edi Ramës, regjistroi procedim penal pa emër për të mbrojtur Irenën me 5 mbiemra, thua se nuk dihej kush e kishte bërë dhe nuk guxoi të pyeste kallëzuesit, por e mbajti në sirtar dhe përdori vetëm letrat e falsifikuara të Irenës me 5 mbiemra. SPAK, me urdhër të Edi Ramës, mori përsipër… Irena Gjoka është shtetase shqiptare dhe ajo në Shqipëri gjykohet dhe vlerësohet vetëm nga ligji shqiptar. Dhe ligji shqiptar e detyron Irenën me 5 mbiemra që ajo të deklarojë çdo dënim që ka marrë në një vend tjetër. Por, meqenëse Republika Helenike, për arsyet e veta, dënimet 1 vit e poshtë, pas 15 vitesh i fshin, sipas Altin Troplinit, kjo nuk është e dënuar. Ky është një krim dhe turp i shëmtuar. Ajo nuk po gjykohet në Greqi, po gjykohet në Shqipëri. Autoritetet greke kanë lëshuar vendim me vulë apostile se ajo është dënuar 1 vit nga Gjykata e Janinës,” tha Berisha.
“`