Sulm pranë centralit bërthamor të Bushehrit në Iran, i treti brenda 10 ditësh
Agjencia Ndërkombëtare e Energjisë Atomike (IAEA) ka njoftuar se është informuar nga Irani për një sulm të ri në afërsi të centralit bërthamor të Bushehrit. Ky është incidenti i tretë i këtij lloji brenda një periudhe vetëm 10 ditësh.
Sipas informacioneve të dhëna nga autoritetet iraniane, sulmi nuk ka shkaktuar dëmtime në reaktorin funksional dhe nuk është regjistruar asnjë rrjedhje rrezatimi. Centrali vijon të funksionojë normalisht, sipas deklaratës së IAEA.
Megjithatë, drejtori i përgjithshëm i agjencisë, Rafael Grossi, ka shprehur shqetësim lidhur me pasojat e mundshme të sulmeve të tilla. Ai ka paralajmëruar se çdo goditje që mund të dëmtojë një reaktor bërthamor rrezikon të shkaktojë një aksident të rëndë me pasoja rrezatimi.
Grossi u ka bërë thirrje palëve të ushtrojnë “përmbajtje maksimale ushtarake”, duke theksuar nevojën për të shmangur çdo përshkallëzim që mund të rrezikojë sigurinë bërthamore dhe popullsinë civile në rajon.