“`html
SPAK kontrollon prona të lidhura me Mirlinda Karçanajn, përfshi një vilë në Palasë
Janë zbuluar detaje të reja nga veprimet hetimore të Byrosë Kombëtare të Hetimit, të cilat zhvillohen në kuadër të dosjes së SPAK për AKSHI. Sipas burimeve, kontrollet kanë përfshirë edhe një vilë në zonën e Palasës, e cila dyshohet se është në posedim të ish-drejtoreshës së AKSHI-t, Mirlinda Karçanaj.
I njëjti burim bën me dije se kontrolle janë ushtruar edhe në prona të tjera, përfshirë banesën e nënës së Karçanajt në Tiranë dhe një banesë në Qerret. Hetuesit dyshojnë se disa prej këtyre pasurive mund të jenë regjistruar në emër të personave të tretë, ndërkohë që vetë Karçanaj ka pretenduar se nuk janë në pronësi të saj.
SPAK nuk ka dhënë detaje zyrtare mbi materialet e sekuestruara, por burime pranë hetimit konfirmojnë se janë marrë pajisje elektronike dhe dokumentacion nga ambientet e kontrolluara. Kjo përfshin edhe një pronë në të njëjtën zonë që lidhet me Ergys Agasi.
Ky zhvillim bie në kontrast me deklaratën publike të kryeministrit Edi Rama, i cili në fund të vitit të kaluar kishte pohuar se Karçanaj jetonte në një banesë me qira. Në një deklaratë publike, Rama u shpreh: “Linda Karçanaj, e cila sot është në masë sigurie në një shtëpi me qira, ku jeton pasi ka jetuar deri pak vite më parë në shtëpinë e prindërve, në një apartament që ishte i kohës së komunizmit…”.
Në dhjetor, SPAK ndërmori një operacion ndaj një grupi të dyshuar kriminal brenda AKSHI-t, ku përfshihej edhe Karçanaj, aktualisht në masë sigurie “arrest në shtëpi”. Ajo dyshohet për veprën penale të shkeljes së barazisë në tendera, në bashkëpunim dhe në kuadër të një grupi të strukturuar kriminal. Sipas një materiali hetimor prej 206 faqesh, prokuroria përshkruan një skemë të organizuar brenda institucionit, e cila dyshohet se ka ndërhyrë në procedurat e prokurimit publik, me qëllim përfitime financiare në vlera të konsiderueshme.
AKSHI konsiderohet një institucion me rëndësi strategjike, pasi administron sistemet kryesore të shërbimeve elektronike të qeverisë, përfshirë platformën e-Albania, dhe luan rol kyç në ndërveprimin mes qytetarëve dhe administratës publike.
Të dhënat e deklaruara nga Inspektoriati i Lartë i Deklarimit dhe Kontrollit të Pasurive tregojnë një profil pasuror më të gjerë të Karçanajt nga sa është paraqitur publikisht. Sipas deklarimeve ndër vite, ajo rezulton të ketë në pronësi dhe bashkëpronësi disa pasuri të paluajtshme.
- Në vitin 2007, Karçanaj deklaronte 25% të një apartamenti 94 m² në Tiranë, përqindje që në vitin 2013 kalon në 50%. Në vitin 2016, kjo pasuri rivlerësohet në rreth 13 milionë lekë.
- Po në vitin 2016, ajo deklaron blerjen e një apartamenti 136 m² në Tiranë për 65 mijë euro, në bashkëpronësi me bashkëshortin, si dhe një apartament 60 m² në Qerret për 17,340 euro. Sipas deklarimeve, këto blerje janë financuar nga të ardhurat dhe kursimet familjare.
- Në vitin 2017, apartamenti i blerë për 65 mijë euro rivlerësohet në rreth 240 mijë euro.
- Ndërsa në vitin 2022, Karçanaj deklaron përfitimin e plotë të apartamentit të parë në Tiranë përmes trashëgimisë, si dhe shtimin e një apartamenti tjetër dhe një sipërfaqeje toke bujqësore prej 1,500 m².
Në total, sipas deklarimeve zyrtare, Karçanaj rezulton me disa pasuri të paluajtshme, përfshirë apartamente në Tiranë dhe Qerret, si dhe pasuri të përfituara përmes trashëgimisë. Hetimet e SPAK synojnë të verifikojnë përputhshmërinë mes këtyre deklarimeve dhe pasurive të identifikuara gjatë kontrolleve në terren.
“`