Projekti i urave: Banka Botërore njofton hapjen e Ura e Viroit në prill dhe gatishmërinë e dokumenteve për 12 projekte të tjera
Ura e Viroit, e vendosur në jug të vendit dhe që lidh Gjirokastrën me pikën kufitare të Kakavijës, pritet të hapet në muajin prill. Ura, me një gjatësi rreth 500 metra, përmendet në vlerësimin më të fundit të publikuar nga Banka Botërore.
Banka Botërore po mbështet financiarisht këtë program me rreth 55 milionë dollarë amerikanë. Ky investim synon përmirësimin e infrastrukturës së disa urave në Shqipëri dhe rritjen e qëndrueshmërisë së tyre ndaj fatkeqësive natyrore.
Sipas raportit, progresi drejt arritjes së objektivave kryesore të projektit është i qëndrueshëm, ndërsa zbatimi i përgjithshëm vlerësohet si mesatarisht i kënaqshëm. Projekti është i ndarë në tre komponentë kryesorë:
- Komponenti i parë: Infrastruktura e urave. Ky komponent përbën pjesën më të madhe të financimit, me rreth 44 milionë dollarë, dhe përfshin ndërtimin e urave të reja si dhe rehabilitimin e atyre ekzistuese.
- Komponenti i dytë: Forcimi i kapaciteteve institucionale. Me një vlerë prej rreth 7 milionë dollarësh, ky komponent synon përmirësimin e standardeve të projektimit, mirëmbajtjes dhe menaxhimit të infrastrukturës.
- Komponenti i tretë: Menaxhimi i projektit. Ky komponent ka një fond prej rreth 4 milionë dollarësh për të siguruar koordinimin dhe zbatimin efikas të investimeve.
Përveç Ura e Viroit, e cila pritet të lehtësojë ndjeshëm trafikun në një aks të rëndësishëm jugor dhe të përmirësojë aksesin turistik në zonë, raporti thekson se kontrata për ndërtimin e Urës së Beshirit tashmë është nënshkruar dhe ka hyrë në fazën e zbatimit. Në të njëjtën kohë, autoritetet kanë finalizuar dokumentet e tenderit për 12 ura të tjera.
Këto investime synojnë jo vetëm modernizimin e infrastrukturës ekzistuese, por edhe rritjen e standardeve të sigurisë, duke adresuar drejtpërdrejt rreziqet nga përmbytjet, erozioni dhe rrëshqitjet e dheut.
Të dhënat tregojnë se ritmi i shpërndarjes së fondeve mbetet relativisht i ulët. Deri më tani është shpërndarë rreth 21% e fondit total, ndërsa mbi 47 milionë dollarë, ose afro 4.7 miliardë lekë, mbeten ende për t’u alokuar. Kjo sugjeron se pjesa më intensive e investimeve pritet të zhvillohet në vitet në vijim.
Afati i përfundimit të projektit është rishikuar më parë dhe aktualisht parashikohet të mbyllet më 31 korrik 2029. Ky afat i gjatë i jep hapësirë autoriteteve për të përshpejtuar procedurat dhe zbatimin në terren.
Projekti konsiderohet kyç për Shqipërinë, një vend i ekspozuar ndaj fenomeneve natyrore si përmbytjet dhe rrëshqitjet e dheut, por edhe ndaj ndikimeve negative njerëzore. Në të kaluarën, këto faktorë kanë dëmtuar rrjetin rrugor dhe kanë izoluar komunitete të tëra, siç ndodhi në aksin Përrenjas-Librazhd.