Titulli origjinal: “Irani është në pikën e tij më të dobët”, Rubio: Presidenti Trump ka një sërë opsionesh për Ngushticën e Hormuzit
Nënkryetari amerikan i Shtetit, Marco Rubio, deklaroi se Shtetet e Bashkuara po bëjnë përparim të shpejtë në dobësimin e aftësive ushtarake të Iranit, duke pritur që synimet të arrihen “brenda javësh, jo muajsh”. Ai theksoi se presidenti amerikan, Donald Trump, “parapëlqen diplomacinë”.
“Ne do të shkatërrojmë bazën e industrisë së tyre të mbrojtjes, që do të thotë aftësinë e tyre për të prodhuar raketa dhe dronë të rinj në të ardhmen, pasi këto paraqesin një kërcënim të madh për rajonin. Ky Iran që shihni tani, ky është Irani në pikën e tij më të dobët”, tha Rubio më 30 mars.
Ai shtoi se SHBA-ja është “në ritëm dhe në fakt para planifikimeve”, duke siguruar se “do t’i arrijë të gjitha këto gjëra brenda javësh, e jo brenda muajsh”.
“Besoj që pika e parë që thekson presidenti është që ai parapëlqen diplomacinë”, tha Rubio. “Siç e kam thënë, këto përpjekje janë ende në fazat fillestare. Po përcillen mesazhe të ndërsjella dhe po zhvillohen disa bisedime, përfshirë përmes ndërmjetësve.”
Duke komentuar kërcënimet e Iranit për të kontrolluar Ngushticën e Hormuzit “në mënyrë të përhershme” dhe për të vendosur një sistem pagese, Rubio deklaroi se Uashingtoni nuk do ta lejojë këtë.
“Jo vetëm që sovraniteti mbi Ngushticën e Hormuzit nuk është i pranueshëm për ne, por nuk do të jetë i pranueshëm as për botën”, tha ai. “Presidenti ka një sërë opsionesh në dispozicion, nëse zgjedh, për të parandaluar që kjo të ndodhë.” Ai theksoi se sovraniteti i Iranit mbi Ngushticën e Hormuzit është “i papranueshëm” për SHBA-në.
Lidhur me Mojtaba Khamenein, udhëheqësin e ri suprem të Iranit, Rubio u shpreh: “Së pari, ne nuk e dimë nëse ai është në pushtet. E di që thonë se ai është në pushtet. Askush nuk e ka parë, askush nuk ka dëgjuar prej tij. Tani është shumë e paqartë. Nuk është fare e qartë se si po merren vendimet brenda Iranit”, i tha Rubio Al Jazeeras më 30 mars.
I pyetur nëse beson se vendet e Bashkimit Evropian dhe NATO-s e kanë tradhtuar Shtetet e Bashkuara në këtë moment kritik, për shkak të refuzimit të disa vendeve evropiane për të mbështetur konfliktin me Iranin, Rubio u shpreh se ishte “shumë zhgënjyese”.
“Pa SHBA-në nuk ka NATO”, paralajmëroi ai aleatët evropianë, duke shtuar se “nëse ne vendosim nesër që do të tërheqim trupat nga Evropa, ky do të ishte fundi i NATO-s. Ata e dinë këtë”.
Ndërkohë që lufta e SHBA-së dhe Izraelit kundër Iranit, që ka nisur më 28 shkurt, po vazhdon, Teherani një ditë më parë tha se ka pranuar, shqyrtuar dhe refuzuar planin amerikan për paqe prej 15 pikash, të dërguar Republikës Islamike përmes ndërmjetësve pakistanezë. Irani e ka quajtur planin “jorealist, të palogjikshëm dhe të tepruar”, teksa ka kryer sulme të reja me dronë dhe raketa kundër Izraelit.
Trump ka vendosur afat deri më 6 prill që Irani të hapë Ngushticën e Hormuzit dhe të pranojë një marrëveshje për t’i dhënë fund luftës, ose do të përballet me sulme amerikane ndaj centraleve energjetike.
Më 29 mars, Trump lavdëroi përparimet në bisedimet me Iranin, duke thënë se ato po zhvilloheshin drejtpërdrejt dhe tërthorazi me udhëheqës “të arsyeshëm” dhe theksoi se Teherani po hapte pjesërisht Ngushticën e Hormuzit, rrugën ujore përmes së cilës kalon rreth 20 për qind e furnizimeve botërore të naftës dhe gazit natyror. Megjithatë, ai ende nuk ka dhënë detaje për atë që e quajti bisedime të drejtpërdrejta me Iranin, udhëheqësit e të cilit mohojnë se po zhvillohen negociata./ REL