Këshilli i Sigurimit i OKB-së dënon sulmin ndaj paqeruajtësve në Liban, ku u vra një person dhe u plagosën tre të tjerë.
Anëtarët e Këshillit të Sigurimit dënuan “me fjalët më të ashpra” sulmin e 18 prillit kundër UNIFIL-it (Forcës së Përkohshme të Kombeve të Bashkuara në Liban). Në këtë sulm humbi jetën një paqeruajtës francez dhe u plagosën tre të tjerë, dy prej të cilëve në gjendje të rëndë.
Në një deklaratë për shtypin, anëtarët e Këshillit shprehën “ngushëllimet dhe dhembshurinë e tyre më të thellë” për familjet dhe të afërmit e viktimave, si dhe solidaritetin me Francën. Ata gjithashtu i shprehën ngushëllimet Kombve të Bashkuara dhe i uruan të plagosurve “shërim të shpejtë dhe të plotë”.
Këshilli i Sigurimit i bëri homazh “përkushtimit dhe shërbimit të të gjithë paqeruajtësve të Kombeve të Bashkuara që rrezikojnë jetën e tyre në shërbim të paqes dhe sigurisë ndërkombëtare”, duke shprehur mirënjohje të thellë për vendet që kontribuojnë me trupa në mision.
Anëtarët e Këshillit përsëritën “mbështetjen e tyre të plotë” për UNIFIL-in dhe u bënë thirrje të gjitha palëve të marrin masat e nevojshme për të garantuar “sigurinë dhe mbrojtjen e personelit dhe objekteve të UNIFIL-it, si dhe lirinë e lëvizjes së misionit”, në përputhje me ligjin ndërkombëtar. Ata theksuan se paqeruajtësit “nuk duhet të jenë kurrë shënjestër sulmi”.
Njëkohësisht, ata i bënë thirrje Kombeve të Bashkuara që të “hetojnë me shpejtësi sulmin përmes UNIFIL” dhe ta mbajnë të informuar vendin që kontribuon me trupa, në përputhje me rezolutat 2518 (2020) dhe 2589 (2021) të Këshillit të Sigurimit. Këshilli kërkoi që përgjegjësit “të mbahen përgjegjës pa vonesë”.
Këshilli i Sigurimit gjithashtu i bëri thirrje bashkësisë ndërkombëtare të forcojë mbështetjen e saj për Forcat e Armatosura Libaneze, duke përfshirë materiale, pajisje dhe financim. Kjo mbështetje synon të sigurojë vendosjen e tyre efektive dhe të qëndrueshme në jug të lumit Litani dhe të forcojë kapacitetin e tyre për të zbatuar Rezolutën 1701.
Deklarata përfundon duke u bërë thirrje të gjitha palëve të zbatojnë plotësisht Rezolutën 1701 dhe të respektojnë armëpushimin e 16 prillit. Këshilli riafirmoi “angazhimin e fortë” për sovranitetin, pavarësinë, integritetin territorial dhe unitetin e Libanit.