“`html
A është gjallë Mojtaba Khamenei? Presidenti iranian: Jam takuar me Ajatollahun e ri për dy orë e gjysmë.
Presidenti iranian, Masoud Pezeshkian, ka konfirmuar publikisht se është takuar personalisht me Mojtaba Khamenein dhe ka zhvilluar një bisedë me të për dy orë e gjysmë. Ky është konfirmimi i parë nga një zyrtar i lartë që udhëheqësi i ri i Republikës Islamike është parë nga dikush, pasi emërimi i tij ka ndodhur më shumë se dy muaj më parë.
Duke folur gjatë një takimi me sindikata dhe përfaqësues të tregut, Pezeshkian nuk ka dhënë detaje të sakta lidhur me kohën, vendin e zhvillimit të takimit, temat e diskutimit apo personat e tjerë të pranishëm.
“Ajo që më bëri më shumë përshtypje nga ky takim ishte mënyra, perspektiva dhe sjellja thellësisht e sinqertë dhe modeste. Kjo qasje transformoi atmosferën në një mjedis të bazuar te besimi, qetësia, empatia dhe dialogu i drejtpërdrejtë,” tha Pezeshkian.
Mojtaba Khamenei u emërua nga Asambleja e Ekspertëve pas vdekjes së babait të tij, Ajatollah Ali Khamenei, i cili humbi jetën në sulme ajrore amerikane dhe izraelite gjatë fazës fillestare të luftës, më 28 shkurt.
Në dy muajt pas emërimit të tij, udhëheqësi i ri nuk është shfaqur në publik dhe nuk ka publikuar asnjë material video apo audio, duke nxitur vazhdimisht spekulime rreth gjendjes së tij shëndetësore. Megjithatë, deklarata që thuhet se janë shkruar prej tij janë lexuar në televizionin shtetëror.
E përditshmja “New York Times”, duke cituar katër zyrtarë iranianë, raportoi më parë se Mojtaba Khamenei pësoi lëndime serioze në sulme, iu nënshtrua disa operacioneve në këmbë dhe krahë dhe ka vështirësi në të folur për shkak të djegieve të rënda në fytyrë dhe buzë. Sekretari i Mbrojtjes i SHBA-së, Pete Hegseth, deklaroi se ai ishte plagosur dhe me shumë gjasa ishte “shpërfytyruar”. Teherani nuk i ka konfirmuar këto raportime.
Spekulimet u shtuan në javët e fundit nga një mural i zbuluar në një qytet iranian, i cili përshkruante Mojtaba Khamenein krahas figurave të cilësuara si martirë të Republikës Islamike, përfshirë babanë e tij dhe ish-komandantin e Forcës Quds të IRGC-së, Qassem Soleimani – të cilët të gjithë janë të vdekur.
Agjencia e Lajmeve “Tasnim”, e lidhur me IRGC-në, iu referua në një postim veçmas Mojtaba Khameneit si “udhëheqësi martir i revolucionit”, përpara se ta përshkruante referencën si një gabim.
“`