“`html
Balla padit Berishën për shpifje, shtyhet seanca në GJKKO, mungon deputeti i PS
Seanca e parë gjyqësore lidhur me padinë për shpifje mes Taulant Ballës dhe Sali Berishës është shtyrë.
Shkak për shtyrjen është bërë mungesa e kreut të grupit të PS, Taulant Balla, i cili kishte paraqitur në gjykatë një kërkesë për shtyrje, pasi e kishte të pamundur të ishte i pranishëm për shkak të mbledhjes së grupit parlamentar.
Berisha ishte përfaqësuar me prokurë të posaçme nga avokati i tij mbrojtës, Genc Gjokutaj.
Gjykatësi Besmir Stroka caktoi datën 22 maj, ora 10:00, për zhvillimin e seancës së radhës.
Kreu i PD-së u padit nga Balla pas publikimeve të bëra prej tij në rrjetet sociale, ku akuzonte Ballën se kishte ndikuar në lirimin nga qelia të Marjo Çelës, vëllait të Suel Çelës, i akuzuar si kreu i një organizate kriminale në Elbasan.
Kreu i PD postoi një mesazh nga “qytetari dixhital”, sipas të cilit “Balla ka nxjerrë nga burgu i Peqinit një person të rrezikshëm si Mario Çela dhe e ka dërguar në një dhomë urgjence në spitalin e Elbasanit”.
Marjo Çela, që prej 20 shkurtit, kur është zhvendosur me urgjencë drejt spitalit të burgut, rikthehet në ambientet spitalore, publike apo private, herë pas here. Kjo për shkak të problemeve të herëpashershme në mushkëri dhe zemër.
Për shkak të këtyre problemeve, Çela kërkoi ndryshim të masës së sigurisë, por kjo kërkesë u refuzua nga Gjykata e Posaçme.
“`